ലണ്ടന്‍: കുട്ടികളുടെ ഫോണടക്കമുള്ള ഉപകരണങ്ങളില്‍ നഗ്നചിത്രങ്ങളും അശ്ലീല ഉള്ളടക്കങ്ങളും സ്വമേധയാ തടയുന്ന സുരക്ഷാ സംവിധാനങ്ങള്‍ ഡിഫോള്‍ട്ടായി സജ്ജമാക്കാന്‍ ടെക് ഭീമന്മാരായ ആപ്പിളിനും ഗൂഗിളിനും ബ്രിട്ടന്റെ നിര്‍ദേശം. ഇതിനായി മൂന്ന് മാസത്തെ സമയപരിധി നല്‍കിയിരിക്കുകയാണ് ബ്രിട്ടീഷ് സര്‍ക്കാര്‍. കുട്ടികള്‍ ഉപയോഗിക്കുന്ന എല്ലാ ഫോണുകളിലും ടാബ്‌ലെറ്റുകളിലും ഈ സുരക്ഷാ ഫീച്ചറുകള്‍ സ്വയം പ്രവര്‍ത്തനക്ഷമമാക്കണമെന്ന് ടെക്‌നോളജി സെക്രട്ടറി ലിസ് കെന്‍ഡല്‍ വ്യക്തമാക്കി.'കുട്ടികളുടെ സുരക്ഷയില്‍ വലിയ ടെക് കമ്പനികള്‍ ഇനി കൂടുതല്‍ ഉത്തരവാദിത്തം ഏറ്റെടുക്കണം' എന്ന മുന്നറിയിപ്പോടെയാണ് സര്‍ക്കാരിന്റെ ഇടപെടല്‍.
ആപ്പിളിന്റെയും ഗൂഗിളിന്റെയും ഓപ്പറേറ്റിങ് സിസ്റ്റങ്ങളാണ് ലോകമെമ്പാടുമുള്ള ഭൂരിഭാഗം സ്മാര്‍ട്ട്ഫോണുകളിലും പ്രവര്‍ത്തിക്കുന്നത്. അതിനാല്‍, ഇവരുടെ സംവിധാനങ്ങളില്‍ വരുന്ന മാറ്റങ്ങള്‍ കോടിക്കണക്കിന് കുട്ടികളുടെ ഡിജിറ്റല്‍ അനുഭവത്തെ നേരിട്ട് ബാധിക്കുമെന്നാണ് വിലയിരുത്തല്‍. കുട്ടികളുടെ സുരക്ഷയ്ക്കായി പ്രവര്‍ത്തിക്കുന്ന മോളി റോസ് ഫൗണ്ടേഷന്‍ ഈ നീക്കത്തെ സ്വാഗതം ചെയ്തെങ്കിലും, പ്രഖ്യാപനങ്ങള്‍ വേഗത്തില്‍ നടത്തുന്നതിന് പകരം വിദഗ്ധരുടെ നിര്‍ദേശങ്ങള്‍ കൂടുതല്‍ കേള്‍ക്കണമെന്ന് ആവശ്യപ്പെട്ടു.
കൂടാതെ , 16 വയസിന് താഴെയുള്ള കുട്ടികളുടെ സോഷ്യല്‍ മീഡിയ ഉപയോഗത്തിന് കൂടുതല്‍ നിയന്ത്രണങ്ങള്‍ ഏര്‍പ്പെടുത്തുന്നതും പരിഗണിക്കുകയാണ്. പ്രായപരിധി മുതല്‍ ചില 'അഡിക്ടീവ്' ഫീച്ചറുകള്‍ക്ക് വിലക്ക് ഏര്‍പ്പെടുത്തല്‍ വരെ വിവിധ നിര്‍ദേശങ്ങള്‍ പരിഗണനയിലാണ്. എന്നാല്‍, ഇത്തരം നടപടികള്‍ ഒടുവില്‍ ഇന്റര്‍നെറ്റ് ഉപയോഗത്തിന് ഐഡി പരിശോധന നിര്‍ബന്ധമാക്കുന്ന രീതിയിലേക്ക് മാറരുതെന്ന് സ്വകാര്യതാ പ്രവര്‍ത്തകരും മുന്നറിയിപ്പ് നല്‍കുന്നു.
