വാരാന്ത്യത്തില് വീണ്ടും ഉഷ്ണതരംഗ ഭീഷണി; ഇംഗ്ലണ്ടില് താപനില കുതിക്കുമെന്ന് മുന്നറിയിപ്പ്
യുകെയില് കഴിഞ്ഞ ദിവസങ്ങളിലുണ്ടായ റെക്കോര്ഡ് ചൂടിന് താല്ക്കാലിക ശമനം ലഭിച്ചെങ്കിലും വരുന്ന വാരാന്ത്യത്തില് വീണ്ടും ഉഷ്ണതരംഗ സാഹചര്യം രൂപപ്പെടാന് സാധ്യതയുണ്ടെന്ന് കാലാവസ്ഥാ വിദഗ്ധര് മുന്നറിയിപ്പ് നല്കി. നിലവില് താപനില സാധാരണ നിലയിലേക്ക് താഴുന്നുണ്ടെങ്കിലും അറ്റ്ലാന്റിക് സമുദ്രത്തില് നിന്നുള്ള ന്യൂനമര്ദ്ദം ബ്രിട്ടനിലേക്ക് വ്യാപിക്കുമെന്നാണ് പ്രവചനം. ഇതോടെ അടുത്ത ആഴ്ചയുടെ തുടക്കത്തില് വീണ്ടും ശക്തമായ ചൂട് അനുഭവപ്പെടാന് സാധ്യതയുണ്ടെന്നാണ് വിലയിരുത്തല്.
ഇംഗ്ലണ്ടിന്റെ തെക്കന് പ്രദേശങ്ങളില് ജൂലൈ ആദ്യവാരത്തില് താപനില 30 ഡിഗ്രി സെല്ഷ്യസിന് മുകളിലെത്തുമെന്നും ചില ഭാഗങ്ങളില് 36 ഡിഗ്രി വരെ ഉയരാമെന്നും റിപ്പോര്ട്ടുകള് സൂചിപ്പിക്കുന്നു. 2022-ല് രേഖപ്പെടുത്തിയ 40.3 ഡിഗ്രി സെല്ഷ്യസ് എന്ന രാജ്യത്തെ എക്കാലത്തെയും ഉയര്ന്ന താപനിലയെ മറികടക്കില്ലെങ്കിലും ഈ വര്ഷത്തെ ഏറ്റവും ചൂടേറിയ ദിവസങ്ങളിലൊന്നായി മാറാന് സാധ്യതയുണ്ട്. കഴിഞ്ഞ ആഴ്ച ഇംഗ്ലണ്ടില് 36.9 ഡിഗ്രി സെല്ഷ്യസ് രേഖപ്പെടുത്തി ജൂണ് മാസത്തിലെ റെക്കോര്ഡ് താപനിലയും ഭേദിച്ചിരുന്നു.
ജൂലൈ മാസത്തുടനീളം സാധാരണയേക്കാള് ഉയര്ന്ന താപനിലയും വരണ്ട കാലാവസ്ഥയും അനുഭവപ്പെടുമെന്നാണ് ദീര്ഘകാല പ്രവചനങ്ങള് സൂചിപ്പിക്കുന്നത്. ഇടയ്ക്കിടെ ഇടിമിന്നലോടുകൂടിയ മഴയ്ക്ക് സാധ്യതയുണ്ടെങ്കിലും മൊത്തത്തില് ചൂടും തെളിഞ്ഞ കാലാവസ്ഥയും തുടരുമെന്നാണ് കാലാവസ്ഥാ നിരീക്ഷണ കേന്ദ്രങ്ങളുടെ വിലയിരുത്തല്. യൂറോപ്പിലെ പല രാജ്യങ്ങളും ഇപ്പോള് അതിശക്തമായ ഉഷ്ണതരംഗത്തെ നേരിടുന്നതിനിടെ ബ്രിട്ടനിലും വീണ്ടും ചൂട് ശക്തമാകുമെന്ന സൂചന അധികൃതരെ ജാഗ്രതയിലാക്കിയിട്ടുണ്ട്.
കഴിഞ്ഞ ദിവസങ്ങളില് കടുത്ത ചൂടിന് പിന്നാലെയെത്തിയ ശക്തമായ ഇടിമിന്നലും മഴയും മോശം കാലാവസ്ഥയും കാരണം ഹീത്രൂ, ഗാറ്റ്വിക് വിമാനത്താവളങ്ങളില് ശനിയാഴ്ച നൂറുകണക്കിന് വിമാനങ്ങള് റദ്ദാക്കിയിരുന്നു. നിരവധി വിമാനങ്ങള് വൈകുകയും ചെയ്തു. തുടര്ച്ചയായി 30 ഡിഗ്രി സെല്ഷ്യസിന് മുകളിലുള്ള ചൂടിന് പിന്നാലെയാണ് ലണ്ടനിലും തെക്കുകിഴക്കന് ഇംഗ്ലണ്ടിലും ശക്തമായ മഴയും ഇടിമിന്നലും ഉണ്ടായത്.
