നന്ദനം എന്ന ഒറ്റ ചിത്രത്തിലൂടെ മലയാളികള്ക്ക് പ്രിയപ്പെട്ട നടനായി മാറിയ ആളാണ് അരവിന്ദ്ആകാശ്. ഇപ്പോഴിതാ അരവിന്ദ് വിവാഹിതനായിരിക്കുകയാണ്. ദീര്ഘകാലത്തെ പ്രണയത്തിനൊടുവിലാണ് അരവിന്ദ് കാമുകി ആര്എസ് സ്വാധിയെ വിവാഹം കഴിച്ചത്. അമ്പതാം വയസിലാണ് അരവിന്ദ് വിവാഹിതനാകുന്നത്.
കഴിഞ്ഞ ദിവസം മലേഷ്യയിലെ ക്വലാലംപൂരില് വച്ചായിരുന്നു വിവാഹം. അടുത്ത സുഹൃത്തുക്കളും ബന്ധുക്കളും മാത്രമായിരുന്നു വിവാഹത്തിന് ക്ഷണിക്കപ്പെട്ടത്. വിവാഹത്തില് നിന്നുള്ള ചിത്രങ്ങള് സോഷ്യല് മീഡിയയില് വൈറലാവുകയാണ്. സംവിധായകന് വെങ്കട്ട് പ്രഭുവടക്കമുള്ളവര് വിവാഹത്തിനെത്തിയിരുന്നു.
വെങ്കട്ട് പ്രഭു ഒരുക്കിയ ചെന്നൈ 28 എന്ന ചിത്രമാണ് അരവിന്ദിനെ താരമാക്കുന്നത്. ചിത്രത്തിലെ താരങ്ങളും വിവാഹത്തിനെത്തിയിരുന്നു. വിവാഹത്തിന്റെ ചിത്രങ്ങള് വൈറലായതോടെ സിനിമാ ലോകവും ആരാധകരുമെല്ലാം താരത്തിന് ആശംസകളുമായി എത്തുകയാണ്. നൃത്ത സംവിധാനത്തിലൂടെയാണ് അരവിന്ദ് സിനിമയില് എത്തുന്നത്. നന്ദനം ആയിരുന്നു ആദ്യ ചിത്രം. പിന്നീട് ചെന്നൈ 600028, ഗോവ, മങ്കാത്ത, ഗോട്ട് തുടങ്ങിയ സിനിമകളില് അഭിനയിച്ചു.
