അമ്മ സംഘടനയിലെ വിവാദങ്ങളുമായി ബന്ധപ്പെട്ട തര്ക്കങ്ങള് രൂക്ഷമാകുന്നതിനിടെ ശ്വേത മേനോനെതിരെ പ്രതിഷേധവുമായി നടി ബീന ആന്റണി രംഗത്ത്. സംഘടനയിലെ ആഭ്യന്തര പ്രശ്നങ്ങള്ക്കിടയില് സുഹൃത്തും ജനപ്രതിനിധിയുമായ രമേഷ് പിഷാരടിയെ മോശം രീതിയില് ചിത്രീകരിക്കാന് ശ്രമിച്ചെന്നാണ് ബീന ആന്റണി ആരോപിക്കുന്നത്. പിഷാരടിയോട് ചെയ്തത് വലിയൊരു തെറ്റായിപ്പോയി എന്നും ബീന ആന്റണി പറഞ്ഞു. അതേസമയം തകര്ച്ചയുടെ വക്കിലുള്ള 'അമ്മ'യെ രക്ഷിക്കാന് മമ്മൂട്ടിയും മോഹന്ലാലും സുരേഷ് ഗോപിയും അടക്കമുള്ള മുതിര്ന്ന താരങ്ങള് മുന്കൈ എടുക്കണമെന്നും ബീന ആന്റണി ആവശ്യപ്പെട്ടു.
ഏറ്റവും അടുത്ത സുഹൃത്തുക്കള് തമ്മിലുള്ള സ്വകാര്യ സംഭാഷണങ്ങള് പുറത്തുവിട്ട് പിഷാരടിയെപ്പോലെ രാഷ്ട്രീയമായി വലിയ ഇമേജില് നില്ക്കുന്ന ഒരു വ്യക്തിയെ വേദനിപ്പിച്ചത് വലിയ വിശ്വാസവഞ്ചനയാണെന്ന് ബീന ആന്റണി പറഞ്ഞു. ശ്വേതയുടെ ഈ പ്രവര്ത്തിയില് തനിക്കുള്ള വ്യക്തിപരമായ എതിര്പ്പും പ്രതിഷേധവും രേഖപ്പെടുത്തുന്നതായി സോഷ്യല് മീഡിയയില് പങ്കുവെച്ച വീഡിയോയിലൂടെ താരം വ്യക്തമാക്കി. സംഘടന നേരിടുന്ന കടുത്ത പ്രതിസന്ധിയില് സഹായിക്കാന് എത്തിയ ആളാണ് പിഷാരടിയെന്നും, അദ്ദേഹത്തെ ഇത്തരമൊരു അവസ്ഥയിലേക്ക് തള്ളിവിട്ട ശ്വേതയുടെ നിലപാടിനോട് ഒരിക്കലും യോജിക്കാന് കഴിയില്ലെന്നും ബീന ആന്റണി പറഞ്ഞു.
