ഹാവര്ഹില്: കേരള കള്ച്ചറല് അസോസിയേഷന് ഹാവര്ഹില് (KCAH) 2026-2027 പ്രവര്ത്തന വര്ഷത്തേക്കുള്ള ആക്ഷന് പ്ലാന് ഹാവര്ഹില് ടൗണ് കൗണ്സില് മേയര് ലോറ മില്ലര്-ജോണ്സ് ഔദ്യോഗികമായി പ്രകാശനം ചെയ്തു.
KCAH ഭാരവാഹികളുമായി മേയര് നടത്തിയ കൂടിക്കാഴ്ചയില് പ്രാദേശിക മലയാളി സമൂഹത്തിന്റെ ക്ഷേമം, സാമൂഹിക ഐക്യം, യുവജന ശാക്തീകരണം, സാംസ്കാരിക പ്രവര്ത്തനങ്ങള്, ജീവകാരുണ്യ പദ്ധതികള് എന്നിവ സംബന്ധിച്ച വിഷയങ്ങള് വിശദമായി ചര്ച്ച ചെയ്തു. കഴിഞ്ഞ വര്ഷങ്ങളില് KCAHയ്ക്ക് മേയര് നല്കിയ പിന്തുണയ്ക്കും ഹാവര്ഹില് ടൗണ് കൗണ്സില് അനുവദിച്ച ഗ്രാന്റുകള്ക്കും സംഘടനയുടെ പേരില് ഭാരവാഹികള് നന്ദി രേഖപ്പെടുത്തി.
യോഗത്തിനിടെ KCAHയുടെ വാര്ഷിക പ്രവര്ത്തന റിപ്പോര്ട്ട് മേയര്ക്ക് സമര്പ്പിച്ചു. തുടര്ന്ന്, പുതിയ പ്രവര്ത്തന വര്ഷത്തില് നടപ്പാക്കുന്ന വിവിധ സാമൂഹിക, സാംസ്കാരിക, കായിക, ജീവകാരുണ്യ, കമ്മ്യൂണിറ്റി വികസന പദ്ധതികള് ഉള്ക്കൊള്ളുന്ന ആക്ഷന് പ്ലാന് മേയര് ഔദ്യോഗികമായി പ്രകാശനം ചെയ്തു.
ചടങ്ങില് KCAH പ്രസിഡന്റ് നോബിന് തമ്പി, വൈസ് പ്രസിഡന്റ് ബിജോ ജോയ്, സെക്രട്ടറി ഷിജോ ജോസഫ്, ജോയിന്റ് സെക്രട്ടറി ജിജോ മാത്യു, ട്രഷറര് ജിന്റോ, ജോയിന്റ് ട്രഷറര് ജോസ്മോന് ബേബി, പി.ആര്.ഒ. നിതിന് വര്ഗീസ്, എക്സിക്യൂട്ടീവ് അംഗം പ്രദീപ് മാത്യു എന്നിവര് പങ്കെടുത്തു.
ഹാവര്ഹിലിലെ മലയാളി സമൂഹത്തിന്റെ ഐക്യവും സാംസ്കാരിക പാരമ്പര്യവും കൂടുതല് ശക്തിപ്പെടുത്തുന്നതിനൊപ്പം പ്രാദേശിക സമൂഹവുമായി സഹകരിച്ച് മാതൃകാപരമായ പ്രവര്ത്തനങ്ങള് നടപ്പാക്കുകയാണ് പുതിയ ആക്ഷന് പ്ലാനിന്റെ പ്രധാന ലക്ഷ്യമെന്ന് KCAH ഭാരവാഹികള് അറിയിച്ചു.
