യുകെയില് ജൂലൈ അവസാനത്തോടെ കാലാവസ്ഥയില് മാറ്റമുണ്ടാകുമെന്നും രാജ്യത്തിന്റെ വിവിധ ഭാഗങ്ങളില് ഇടിമിന്നലോടുകൂടിയ മഴയ്ക്ക് സാധ്യതയുണ്ടെന്നും മെറ്റ് ഓഫിസ്. അതേസമയം, ഓഗസ്റ്റിലും താപനില ശരാശരിയേക്കാള് ഉയര്ന്ന നിലയില് തുടരുമെന്നും ചില പ്രദേശങ്ങളില് വീണ്ടും ഉഷ്ണതരംഗം അനുഭവപ്പെടാമെന്നും ദീര്ഘകാല കാലാവസ്ഥാ പ്രവചനത്തില് മുന്നറിയിപ്പുണ്ട്. മെറ്റ് ഓഫിസിന്റെ ഏറ്റവും പുതിയ പ്രവചനമനുസരിച്ച്, ജൂലൈ അവസാനത്തോടെ രാജ്യത്ത് നിലനില്ക്കുന്ന ഉയര്ന്ന മര്ദത്തിന്റെ ശക്തി കുറയാനാണ് സാധ്യത. ഇതിന്റെ ഫലമായി ആദ്യം വടക്കന് മേഖലകളില് മഴയും ഇടിമിന്നലോടുകൂടിയ മഴയും ശക്തമാകും. പിന്നീട് ഇത് തെക്കന് മേഖലകളിലേക്കും വ്യാപിച്ചേക്കും.
ഓഗസ്റ്റ് ആദ്യ ദിവസങ്ങളില് കാലാവസ്ഥ കൂടുതല് വ്യതിയാനങ്ങള്ക്ക് വിധേയമാകുമെങ്കിലും രാജ്യത്തിന്റെ ഭൂരിഭാഗം പ്രദേശങ്ങളിലും താപനില സാധാരണയേക്കാള് ഉയര്ന്ന നിലയില് തുടരുമെന്നാണ് വിലയിരുത്തല്. അതിനാല് വീണ്ടും ഉഷ്ണതരംഗം രൂപപ്പെടാനുള്ള സാധ്യത തള്ളിക്കളയാനാകില്ലെന്നും മെറ്റ് ഓഫിസ് വ്യക്തമാക്കി. അതേസമയം, തെക്കന്, തെക്കുകിഴക്കന് ഇംഗ്ലണ്ടില് ഇടവിട്ട് വരണ്ട കാലാവസ്ഥ തുടരാനിടയുണ്ട്. അതിനാല് മഴ ലഭിച്ചാലും എല്ലാ പ്രദേശങ്ങളിലെയും വരള്ച്ചയ്ക്കും ജലക്ഷാമത്തിനും ഉടന് ശമനമുണ്ടാകണമെന്നില്ല.
ഈ വേനല്ക്കാലം ഇതിനോടകം യുകെയുടെ ചരിത്രത്തിലെ ഏറ്റവും ചൂടേറിയ വേനല്ക്കാലങ്ങളിലൊന്നായി മാറിയിരിക്കുകയാണ്. ഉയര്ന്ന താപനിലയും മഴക്കുറവും രാജ്യത്തിന്റെ വിവിധ ഭാഗങ്ങളില് ജലക്ഷാമത്തിനും കാട്ടുതീ ഭീഷണിക്കും കാരണമായിട്ടുണ്ട്. ദീര്ഘകാല പ്രവചനങ്ങളിലൂടെ ദിവസേനയുള്ള കാലാവസ്ഥാ മാറ്റങ്ങള് കൃത്യമായി നിര്ണയിക്കാന് കഴിയില്ല. എന്നാല് ജൂലൈ അവസാനത്തിലും ഓഗസ്റ്റിന്റെ ആദ്യ പകുതിയിലും കൂടുതല് അസ്ഥിരമായ കാലാവസ്ഥയ്ക്കൊപ്പം ശരാശരിയേക്കാള് ഉയര്ന്ന താപനിലയും അനുഭവപ്പെടുമെന്നാണ് നിലവിലെ സൂചനയെന്ന് മെറ്റ് ഓഫിസ് അറിയിച്ചു
