കൊല്‍ക്കത്തയില്‍നിന്ന് ബ്രിട്ടനിലേക്കു കുടിയേറിയ ഇന്ത്യന്‍ അക്കാദമിക്കിന്റെ മകള്‍ ലിസ നാന്‍ഡി (46) വീണ്ടും ബ്രിട്ടീഷ് മന്ത്രിസഭയിലെ പ്രധാന മുഖം. പ്രധാനമന്ത്രി ആന്‍ഡി ബേണ്‍ഹാം പ്രഖ്യാപിച്ച മന്ത്രിസഭയില്‍ ഡിജിറ്റല്‍, സാംസ്‌കാരികം, മാധ്യമം, കായികം വകുപ്പിന്റെ സെക്രട്ടറിയായാണ് ലിസയെ നിയമിച്ചത്. സ്റ്റാര്‍മര്‍ സര്‍ക്കാരില്‍ 2024 ജൂലൈ മുതല്‍ സാംസ്‌കാരികം, മാധ്യമം, കായികം വകുപ്പിന്റെ സെക്രട്ടറിയായിരുന്നു ലിസ. പുതിയ മന്ത്രിസഭയില്‍ ഡിജിറ്റല്‍ മേഖലകൂടി ഉള്‍പ്പെടുത്തി വിപുലീകരിച്ച വകുപ്പിന്റെ ചുമതലയാണ് നല്‍കിയിരിക്കുന്നത്. ജൂലൈ 20നാണ് നിയമനം പ്രാബല്യത്തില്‍ വന്നത്. ബ്രിട്ടീഷ് സര്‍ക്കാരിന്റെ ഔദ്യോഗിക അറിയിപ്പ്
1979 ഓഗസ്റ്റ് ഒന്‍പതിന് മാഞ്ചസ്റ്ററില്‍ ജനിച്ച ലിസ, 2010 മുതല്‍ ഗ്രേറ്റര്‍ മാഞ്ചസ്റ്ററിലെ വിഗന്‍ മണ്ഡലത്തെ പ്രതിനിധീകരിക്കുന്ന ലേബര്‍ എംപിയാണ്. ന്യൂകാസില്‍ സര്‍വകലാശാലയില്‍നിന്ന് രാഷ്ട്രീയശാസ്ത്രത്തില്‍ ബിരുദവും ലണ്ടന് സര്‍വകലാശാലയിലെ ബിര്‍ക്‌ബെക്കില്‍നിന്ന് പൊതുനയത്തില്‍ ബിരുദാനന്തര ബിരുദവും നേടി. പാര്‍ലമെന്റിലെത്തുന്നതിനുമുന്‍പ് ഭവനരഹിതരായ യുവാക്കള്‍ക്കുവേണ്ടി പ്രവര്‍ത്തിക്കുന്ന സെന്റര്‍പോയിന്റില്‍ ഗവേഷകയായിരുന്നു. പിന്നീട് ദി ചില്‍ഡ്രന്‍സ് സൊസൈറ്റിയില്‍ സീനിയര്‍ പോളിസി അഡൈ്വസറായി പ്രവര്‍ത്തിച്ചു. കുട്ടികള്‍, യുവ അഭയാര്‍ഥികള്‍, സാമൂഹികമായി പിന്നാക്കം നില്‍ക്കുന്നവര്‍ എന്നിവരുമായി ബന്ധപ്പെട്ട വിഷയങ്ങളിലായിരുന്നു പ്രധാനമായും ഇടപെട്ടത്. ലിസ നാന്‍ഡിയുടെ ഔദ്യോഗിക പ്രൊഫൈല്‍
ലിസയുടെ പിതാവ് ദിപക് നാന്‍ഡി കൊല്‍ക്കത്തയില്‍ ജനിച്ച അക്കാദമിക്കും പ്രമുഖ വംശീയവിവേചനവിരുദ്ധ പ്രവര്‍ത്തകനുമാണ്. ഉന്നതപഠനത്തിനായി 1956ല്‍ ബ്രിട്ടനിലെത്തിയ അദ്ദേഹം, 1968ല്‍ സ്ഥാപിതമായ റണ്ണിമീഡ് ട്രസ്റ്റിന്റെ ആദ്യ ഡയറക്ടറായി. പിന്നീട് ഇക്വല്‍ ഓപ്പര്‍ച്യൂണിറ്റീസ് കമ്മിഷന്റെ ഡെപ്യൂട്ടി ഡയറക്ടറായും പ്രവര്‍ത്തിച്ചു. ബ്രിട്ടനിലെ വര്‍ണസമത്വ-സാമൂഹികനീതി പോരാട്ടങ്ങളില്‍ നിര്‍ണായക സംഭാവന നല്‍കിയ വ്യക്തിയാണ് അദ്ദേഹം.
ഷാഡോ വിദേശകാര്യ സെക്രട്ടറി, ഷാഡോ ലെവലിങ് അപ് സെക്രട്ടറി, രാജ്യാന്തര വികസനകാര്യ ഷാഡോ മന്ത്രി തുടങ്ങി ലേബര്‍ പാര്‍ട്ടിയിലെ വിവിധ പ്രധാന പദവികള്‍ ലിസ വഹിച്ചിട്ടുണ്ട്. ബ്രിട്ടനിലെ സാംസ്‌കാരിക സ്ഥാപനങ്ങള്‍, മാധ്യമനയം, ബിബിസി ഉള്‍പ്പെടെയുള്ള പൊതുസേവന മാധ്യമങ്ങള്‍, സൃഷ്ടിപര വ്യവസായങ്ങള്‍, കായികരംഗം, ഡിജിറ്റല്‍ നയം എന്നിവയുടെ മേല്‍നോട്ടമാണ് പുതിയ വകുപ്പില്‍ അവര്‍ക്കുള്ളത്. പബ്ലിക് റിലേഷന്‍സ് കണ്‍സല്‍ട്ടന്റായ ആന്‍ഡി കോളിസാണ് ലിസയുടെ പങ്കാളി. ദമ്പതികള്‍ക്ക് ഒരു മകനുണ്ട്. കുടുംബത്തോടൊപ്പം വിഗനിലാണ് താമസം. ഇന്ത്യന്‍ കുടിയേറ്റ കുടുംബത്തിന്റെ രണ്ടാം തലമുറയില്‍നിന്ന് ബ്രിട്ടന്റെ ഭരണനേതൃത്വത്തിലെ പ്രധാന പദവിയിലേക്ക് ഉയര്‍ന്ന ലിസയുടെ യാത്ര, രാജ്യത്തെ ഇന്ത്യന്‍ വംശജരുടെ വര്‍ധിക്കുന്ന രാഷ്ട്രീയ സ്വാധീനത്തിന്റെ ശ്രദ്ധേയ ഉദാഹരണമാണ്.
