യുകെയിലെ ജയിലുകളിലെ തിക്കും തിരക്കും പരിഗണിച്ച് കുറ്റവാളികളെ ശിക്ഷ പൂര്‍ത്തിയാകുന്നതിന് മുന്‍പ് മോചിപ്പിക്കാനുള്ള സ്‌കീം പ്രതിസന്ധിയില്‍. സ്‌കീം റിവ്യൂ ചെയ്യാന്‍ പ്രധാനമന്ത്രി ആന്‍ഡി ബേണ്‍ഹാം ഉത്തരവ് നല്‍കിയെങ്കിലും പദ്ധതിയുമായി മുന്നോട്ട് പോകുമെന്നാണ് നിലവിലെ സൂചന.
പോലീസുകാരന്‍ ആന്‍ഡ്രൂ ഹാര്‍പ്പറുടെ കൊലയാളികളും ശിക്ഷാ കാലാവധി പൂര്‍ത്തിയാകുന്നതിന് മുന്‍പ് പുറത്തുവരുമെന്ന് വ്യക്തമായതോടെ വിഷയം പരിശോധിക്കുമെന്ന് പ്രധാനമന്ത്രി പ്രഖ്യാപിച്ചിരുന്നു. 13 വര്‍ഷത്തെ ശിക്ഷ കിട്ടിയ കൊലയാളികള്‍ പകുതി ശിക്ഷ പോലും പൂര്‍ത്തിയാക്കും മുന്‍പ് പുറത്തിറങ്ങുന്നതിനെ ഹാര്‍പ്പറുടെ വിധവ ലിസി ഹാര്‍പ്പര്‍ രൂക്ഷമായി വിമര്‍ശിച്ചിരുന്നു.
സെപ്റ്റംബറിലാണ് പുതിയ സെന്റന്‍സിംഗ് ആക്ട് നിലവില്‍ വരുന്നത്. കുറ്റവാളികളെ മുന്‍കൂര്‍ മോചിപ്പിക്കുന്ന ഈ സ്‌കീം പ്രകാരം 6000 ക്രിമിനലുകളെങ്കിലും പുറത്തിറങ്ങുമെന്നാണ് കണക്ക്. എന്നാല്‍ ഇതുവഴി കൊലയാളികളും, ബലാത്സംഗ കുറ്റവാളികളും, കുട്ടിപ്പീഡകരും പുറത്തിറങ്ങുന്നത് തടയുമെന്ന് ഉറപ്പിക്കാന്‍ ഗവണ്‍മെന്റിന് ഇതുവരെ സാധിച്ചിട്ടില്ല.
പ്രധാനമന്ത്രി റിവ്യൂ ഉത്തരവ് നല്‍കിയിട്ടുണ്ടെങ്കിലും സ്‌കീം സെപ്റ്റംബറില്‍ മുന്നോട്ട് പോകുമെന്നതാണ് അവസ്ഥ. വരുന്ന ആഴ്ചകളില്‍ ഇക്കാര്യത്തില്‍ മാറ്റം ഉണ്ടാകുമെന്നാണ് പ്രതീക്ഷ.
അതിനിടെ, ലൈംഗിക കുറ്റവാളികളെ നിയന്ത്രിച്ച് നിര്‍ത്താന്‍ കെമിക്കല്‍ ഉപയോഗിച്ചുള്ള ഷണ്ഡീകരണം യുകെ ജയിലുകളില്‍ വ്യാപിപ്പിക്കും. രാജ്യത്തെ കൂടുതല്‍ ജയിലുകളിലേക്ക് കുറ്റവാളികളുടെ ലൈംഗികശേഷി ഇല്ലാതാക്കുന്ന നടപടി വ്യാപിപ്പിക്കുമെന്ന് ജസ്റ്റിസ് സെക്രട്ടറി പ്രഖ്യാപിച്ചു.
ക്രിമിനലുകള്‍ക്ക് എതിരായ ഷണ്ഡീകരണം ഉപേക്ഷിക്കുമെന്ന ആശങ്കകള്‍ തള്ളിയാണ് കടുത്ത നടപടികള്‍ തുടരുമെന്ന് മന്ത്രി വ്യക്തമാക്കിയത്. കഴിഞ്ഞ വര്‍ഷമാണ് ഹോം സെക്രട്ടറി ഷബാന മഹ്മൂദ് കെമിക്കല്‍ ഷണ്ഡീകരണം ആദ്യമായി അവതരിപ്പിച്ചത്.
