ലണ്ടന്: സൗത്ത് ലണ്ടനിലെ ക്ലാപ്പാം വില്ലിംഗ്ടണ് റോഡിലെ പബ്ബിന് സമീപമുണ്ടായ വെടിവെയ്പില് 25കാരനായ യുവാവ് കൊല്ലപ്പെട്ടു. ബസ് ഡ്രൈവറായ യുവാവാണ് ദാരുണമായി കൊല്ലപ്പെട്ടത്. രാത്രി പത്ത് മണിയോടെ വെടിവെയ്പ് ശബ്ദം കേട്ട് എത്തിയ മെട്രോപൊളിറ്റന് പൊലീസും പാരാമെഡിക്കല് സംഘവും രക്ഷിക്കാന് ശ്രമിച്ചെങ്കിലും സംഭവസ്ഥലത്തു വെച്ച് തന്നെ മരണം സംഭവിച്ചിരുന്നു. തന്റെ പെണ്സുഹൃത്തിനെ പബ്ബില് ഡ്രോപ്പ് ചെയ്യാന് വന്നതായിരുന്നു ഇയാള്.
സംഭവത്തിന് പിന്നാലെ വെടിയേറ്റ പരിക്കുകളോടെ ആശുപത്രിയില് ചികിത്സ തേടിയെത്തിയ 22കാരനെ കൊലപാതകക്കുറ്റത്തിന് പൊലീസ് അറസ്റ്റ് ചെയ്തിട്ടുണ്ട്. കൊല്ലപ്പെട്ട യുവാവ് നിരപരാധിയാണെന്നും അബദ്ധത്തില് അക്രമികളുടെ മുന്നില്പെട്ടുപോയതാണ് ദുരന്തത്തിന് കാരണമെന്നും സുഹൃത്തുക്കള് പറഞ്ഞു. സംഭവത്തില് മെട്രോപൊളിറ്റന് പൊലീസ് കൂടുതല് അന്വേഷണം നടത്തിവരികയാണ്.
