മിഡില് ഈസ്റ്റ് സംഘര്ഷം തുടരുന്നത് മൂലം ബ്രിട്ടനില് മോര്ട്ട്ഗേജ് ചെലവുകള് വീണ്ടും വര്ദ്ധിക്കുന്നു. ഭവനഉടമകളെ സംബന്ധിച്ച് ഇത് വലിയ തിരിച്ചടിയായി മാറുകയാണ്. പ്രത്യേകിച്ച് റീമോര്ട്ട്ഗേജ് ചെയ്യുന്നവര്ക്കാണ് ബാധ്യത കുതിച്ചുയര്ന്നതായി അനുഭവപ്പെടുക.
കഴിഞ്ഞ ഏതാനും ആഴ്ചകളായി മോര്ട്ട്ഗേജ് നിരക്കുകള് പതിയെ വര്ദ്ധിക്കുന്നുണ്ട്. അഞ്ച് വര്ഷത്തെ ശരാശരി ഫിക്സഡ് ഡീലുകളുടെ നിരക്ക് ജൂലൈയില് 5.66 ശതമാനത്തിലേക്ക് ഉയര്ന്നതായി കണക്കുകള് വ്യക്തമാക്കുന്നു. കൂടാതെ രണ്ട് വര്ഷത്തെ ഫിക്സഡ് റസിഡന്ഷ്യല് മോര്ട്ട്ഗേജ് റേറ്റ് ഇപ്പോള് 5.63 ശതമാനത്തിലുമാണ്.
കഴിഞ്ഞ വര്ഷം യഥാക്രമം 5 ശതമാനവും, 4.96 ശതമാനവും ഉണ്ടായിരുന്ന ഇടത്താണ് ഈ കുതിപ്പ്. ഇറാന് യുദ്ധത്തില് ഇടക്കാല വെടിനിര്ത്തല് പ്രഖ്യാപിച്ച ജൂണില് നിരക്ക് താഴ്ന്നെങ്കിലും ഹോര്മുസ് കടലിടുക്കിനെ കേന്ദ്രീകരിച്ച് സംഘര്ഷം തുടര്ന്നത് തിരിച്ചടിയായി. സമാധാന ചര്ച്ചകള് വഴിമുട്ടിയതോടെ പണപ്പെരുപ്പവും, പലിശ നിരക്കും വീണ്ടും വര്ദ്ധിക്കുമെന്ന ആശങ്ക ശക്തമായി.
ഈ വര്ഷം ഏകദേശം ഏഴര ലക്ഷം ഭവനങ്ങളുടെ ഫിക്സഡ് റേറ്റ് ഡീലുകള് കാലാവധി പൂര്ത്തിയാക്കും. 3 ശതമാനത്തില് താഴെ നില്ക്കുമ്പോള് ഡീല് നേടിയതിനാല് റീമോര്ട്ട്ഗേജ് ചെയ്യാന് കൂടിയ നിരക്ക് നല്കേണ്ടിവരും. അടുത്ത ഏതാനും മാസങ്ങളില് നിരക്ക് ഉയര്ന്ന് തന്നെ തുടരുമെന്നാണ് വിദഗ്ധര് മുന്നറിയിപ്പ് നല്കുന്നത്.
സംഘര്ഷത്തിന് അയവ് വന്നെങ്കില് മാത്രമാണ് ഇതില് മാറ്റം പ്രതീക്ഷിക്കേണ്ടതുള്ളൂ. ജൂലൈയില് ബാങ്ക് ഓഫ് ഇംഗ്ലണ്ട് ബേസ് റേറ്റ് നിലനിര്ത്തിയെങ്കിലും മൂന്ന് അംഗങ്ങള് നിരക്ക് ഉയര്ത്തുന്നതിനെ പിന്തുണച്ചിരുന്നു. അതുകൊണ്ട് തന്നെ പുതിയ വീട് വാങ്ങുന്നവരും, റീമോര്ട്ട്ഗേജ് ചെയ്യുന്നവരും കൂടുതല് കാത്തിരിക്കാതെ ഡീല് ഉറപ്പിക്കുന്നതാണ് നല്ലതെന്ന് വിദഗ്ധര് വ്യക്തമാക്കുന്നു.
