മാഞ്ചസ്റ്ററില്‍ മലയാളി നഴ്സിനെ മരിച്ച നിലയില്‍ കണ്ടെത്തി. തൃശൂര്‍ സ്വദേശിനിയായ ഷൈനി( 27)യെയാണ് മരിച്ച നിലയില്‍ കണ്ടെത്തിയത്. സാല്‍ഫോര്‍ഡ് ഹോസ്പിറ്റലില്‍ നഴ്സായി ജോലി ചെയ്തുവരികയായിരുന്നു.
നഴ്സിങ് ഹോമില്‍ ജോലി ചെയ്യുന്ന ഭര്‍ത്താവ് നൈറ്റ് ഡ്യൂട്ടി കഴിഞ്ഞ് വീട്ടിലെത്തിയപ്പോഴാണ് ഷൈനിയെ മരിച്ച നിലയില്‍ കണ്ടെത്തിയതെന്നാണ് റിപ്പോര്‍ട്ട്. ഉടന്‍ വൈദ്യസഹായം തേടിയെങ്കിലും മരണം സ്ഥിരീകരിക്കുകയായിരുന്നു.
നാല് വര്‍ഷം മുമ്പാണ് ഷൈനി യുകെയിലെത്തിയത്. വിവാഹിതയായിട്ട് ഏകദേശം ഒരു വര്‍ഷം മാത്രമായിരുന്നുവെന്നാണ് വിവരം. മരണത്തിന് തൊട്ടുമുമ്പുള്ള ദിവസവും ഷൈനി ജോലിക്ക് പോയിരുന്നു. യുവതിക്ക് മാനസിക സമ്മര്‍ദ്ദമുണ്ടായിരുന്നതായി അറിയില്ലെന്നാണ് സഹപ്രവര്‍ത്തകര്‍ പറയുന്നത്.
ഷൈനിയും ഭര്‍ത്താവും മാര്‍ത്തോമാ സഭാ വിശ്വാസികളാണെന്നാണ് വിവരം. മലയാളി സമൂഹത്തിലെ പലര്‍ക്കും കുടുംബവുമായി അടുത്ത ബന്ധമില്ലായിരുന്നുവെന്നാണ് റിപ്പോര്‍ട്ട്. യുവതിയുടെ അപ്രതീക്ഷിത മരണം സുഹൃത്തുക്കളെയും സഹപ്രവര്‍ത്തകരെയും മലയാളി സമൂഹത്തെയും ഞെട്ടിച്ചിരിക്കുകയാണ്.
മരണകാരണം സംബന്ധിച്ച് ഔദ്യോഗിക വിശദാംശങ്ങള്‍ പുറത്തുവന്നിട്ടില്ല. മൃതദേഹം നാട്ടിലെത്തിക്കുന്നതിനുള്ള നടപടികള്‍ പുരോഗമിക്കുകയാണ്.
