ജയിലുകളിലെ തിരക്ക് കുറയ്ക്കാന്‍ കുറ്റവാളികളെ മോചിപ്പിക്കുന്നതിന്റെ ഭാഗമായി മുന്‍കരുതല്‍ പദ്ധതിയുമായി സര്‍ക്കാര്‍. ഇതിന്റെ ഭാഗമായി ഇംഗ്ലണ്ടിലെയും, വെയില്‍സിലെയും ലൈംഗിക കുറ്റവാളികളുടെ ലൈംഗിക ആസക്തി കുറയ്ക്കാനുള്ള മരുന്നുകള്‍ വ്യാപകമായി പ്രയോഗിക്കാന്‍ ഒരുങ്ങുകയാണ് . ഇംഗ്ലണ്ടിലെ ആയിരക്കണക്കിന് ലൈംഗിക കുറ്റവാളികളില്‍ ഇത് നടപ്പിലാക്കാനാണ് നീക്കം. ഇംഗ്ലണ്ടിലെയും, വെയില്‍സിലെയും പുരുഷ തടവുകാര്‍ക്കാണ് 2028 ഡിസംബറോടെ ലൈംഗിക ആസക്തി കുറയ്ക്കാനുള്ള മരുന്ന് വ്യാപകമായി നല്‍കുകയെന്ന് വിദഗ്ധര്‍ പറഞ്ഞു.
ജയിലുകളില്‍ തടവുകാരുടെ ലൈംഗിക ത്വര കുറയ്ക്കാനുള്ള മരുന്നുകളുടെ ഉപയോഗം പരീക്ഷിച്ചതില്‍ നാലിലൊന്ന് കുറ്റവാളികള്‍ക്കും ഇത് നല്‍കാന്‍ കഴിയുമെന്ന് വ്യക്തമായതായി പ്രൊഫ. ബെലിന്‍ഡ വിന്‍ഡര്‍ വ്യക്തമാക്കി. ജയിലുകളിലെ തിരക്ക് പ്രതിസന്ധി സൃഷ്ടിക്കുമ്പോള്‍ ഇത് കുറയ്ക്കാന്‍ ഈ മരുന്നുകള്‍ സഹായിക്കുമെന്നതിനാല്‍ ബേണ്‍ഹാം ഗവണ്‍മെന്റ് ഇതിന് അനുകൂലമാണ്.
അതേസമയം, ഗുരുതര ലൈംഗിക കുറ്റവാളികളുടെ ഷണ്ഡീകരണം നടത്താനായി കെമിക്കല്‍ കാസ്‌ട്രേഷന്‍ പോലുള്ളവ ഉപയോഗിക്കാനുള്ള ഹോം സെക്രട്ടറി ഷബാന മഹ്മൂദിന്റെ നിര്‍ദ്ദേശം മന്ത്രിമാര്‍ പരിശോധിച്ച് വരികയാണ്. ലൈംഗിക കുറ്റകൃത്യങ്ങളില്‍ ശിക്ഷിക്കപ്പെട്ട് ഇംഗ്ലണ്ടിലും, വെയില്‍സിലുമായി ഏകദേശം 15,000 കുറ്റവാളികള്‍ അകത്ത് കിടക്കുന്നുണ്ട്.
ഓരോ മാസവും ഓണ്‍ലൈന്‍ കുട്ടിപ്പീഡന കുറ്റകൃത്യങ്ങളില്‍ 850-ലേറെ പുരുഷന്‍മാരാണ് പിടിയിലാകുന്നത്. നിലവില്‍ ലൈംഗിക കുറ്റവാളികള്‍ക്ക് മരുന്ന് നല്‍കുന്നത് 10 ജയിലുകളിലാണ്. ഇത് നവംബറോടെ 20 ജയിലിലേക്ക് വര്‍ദ്ധിപ്പിക്കും.
ലൈംഗിക കുറ്റവാളികളെ മോചിപ്പിക്കുന്നതിലുള്ള ആശങ്ക പരിഗണിച്ചാണ് മരുന്നുകള്‍ പ്രയോഗിക്കാനുള്ള തീരുമാനം.
