അമേരിക്കയില് രണ്ട് മലയാളി യുവതികള് കൊല്ലപ്പെട്ടു. മലയാളിയായ മറ്റൊരു യുവതിയാണ് കൊലപാതകങ്ങള് നടത്തിയതെന്നാണ് വിവരം. കാലിഫോര്ണിയായിലെ മില്പിറ്റാസില് ശനിയാഴ്ചയാണ് സംഭവം.
തൃശ്ശൂര് മുടിക്കോട് പാണഞ്ചേരി തെക്കൂട്ട് ഹരിദാസ്- സുഷമ ദമ്പതികളുടെ മകള് അഞ്ജന (35), കോട്ടയം ചിങ്ങവനം സ്വദേശിനി ആന് എന്നിവരാണ് കൊല്ലപ്പെട്ടത്. സംഭവത്തില് ഇവരുടെ സുഹൃത്ത് അനില പോലീസിന്റെ കസ്റ്റഡിയിലായി. വിലങ്ങന്നൂര് സ്വദേശി വിജീഷ് ആണ് മരിച്ച അഞ്ജനയുടെ ഭര്ത്താവ്. ഏക മകള് വാമിക.
ഫ്ലാറ്റിന്റെ താഴേക്ക് അഞ്ജനയെ വിളിച്ചുവരുത്തിയ അനില കാറിടിച്ച് കൊലപ്പെടുത്തുകയായിരുന്നുവെന്നാണ് വിവരം. തുടര്ന്ന് നിര്ത്താതെ പോയ കാര് ഭര്ത്താവ് വിജീഷ് തിരിച്ചറിഞ്ഞു. വിജീഷ് ഉടന്തന്നെ ഇവരുടെ പൊതുസുഹൃത്തായ ആനിന്റെ ഭര്ത്താവ് ജേക്കബിനെ വിളിച്ച് വിവരം അറിയിച്ചു. ആനിനെ ഫോണില് ബന്ധപ്പെടാന് ശ്രമിച്ചിട്ട് കഴിയാതിരുന്ന ഭര്ത്താവ് ഫ്ലാറ്റില് ചെന്നപ്പോഴാണ് കുത്തേറ്റ് മരിച്ച നിലയില് ആനിനെ കണ്ടതെന്നാണ് ലഭിക്കുന്ന വിവരം.
മൂന്നുപേരും ഉറ്റ സുഹൃത്തുക്കള് ആയിരുന്നെന്ന് അഞ്ജനയുടെ വീട്ടുകാര് പറഞ്ഞു. കൊലപാതകത്തിന്റെ കാരണം വ്യക്തമല്ല. കഴിഞ്ഞ എട്ടുവര്ഷമായി അഞ്ജനയും ഭര്ത്താവ് വിജീഷും കാലിഫോര്ണിയയില് ജോലിചെയ്ത് വരികയാണ്.
