മലയാളി ദമ്പതികളെ ഗുരുഗ്രാമിലെ ഫ്ലാറ്റില്‍ മരിച്ച നിലയില്‍ കണ്ടെത്തി. കോഴിക്കോട് കൊടുവള്ളി പുള്ളാവൂര്‍ സ്വദേശിയായ മുഹമ്മദ് അസ്ലം (30), ഭാര്യ മലപ്പുറം കൊണ്ടോട്ടി നെടിയിരുപ്പ് സ്വദേശിനി ഫര്‍ഹാന (28) എന്നിവരെയാണ് മരിച്ച നിലയില്‍ കണ്ടെത്തിയത്.
ഫര്‍ഹാനയെ കഴുത്ത്‌ഞെരിച്ച് കൊന്ന് അസ്ലം ജീവനൊടുക്കിയതാണെന്ന് ഗുരുഗ്രാം പോലീസിനെ ഉദ്ധരിച്ച് പിടിഐ റിപ്പോര്‍ട്ട് ചെയ്തു. ഗുരുഗ്രാം സെക്ടര്‍ 68-ലെ വാടക അപ്പാര്‍ട്ട്മെന്റില്‍ വ്യാഴാഴ്ചയാണ് ഇരുവരെയും മരിച്ച നിലയില്‍ കണ്ടെത്തിയത്. സ്വകാര്യ സ്ഥാപനത്തിലെ ജീവനക്കാരനാണ് അസ്ലം .
കൃത്യത്തിന് മുമ്പ് അസ്ലം, പിതാവിന്റെയും വീട്ടുഉടമയുടെയും മൊബൈല്‍ നമ്പറുകള്‍ ഉള്‍പ്പെടുത്തി തന്റെ ഓഫീസിലേക്ക് ഇ-മെയില്‍ അയച്ചിരുന്നു. സംഭവം ഇവരെ അറിയിക്കണമെന്ന് അദ്ദേഹം കമ്പനിയോട് അഭ്യര്‍ത്ഥിച്ചിരുന്നതായും പൊലീസ് പറഞ്ഞു.
അസ്ലം ഭാര്യയെ കൊലപ്പെടുത്തിയ ശേഷം തൂങ്ങിമരിക്കുകയായിരുന്നുവെന്ന് പൊലീസ് പറഞ്ഞു. ആത്മഹത്യാ കുറിപ്പുകളൊന്നും കണ്ടെത്തിയിട്ടില്ലാത്തതിനാല്‍ കൊലപാതകത്തിന്റെയും ആത്മഹത്യയുടെയും കാരണം വ്യക്തമല്ലെന്നും പോലീസ് അറിയിച്ചു.
നേരത്തെ ബംഗളൂരുവില്‍ ജോലി ചെയ്തിരുന്ന ഇരുവരും മാസങ്ങള്‍ക്ക് മുമ്പാണ് ഗുഡ്ഗാവിലെത്തിയത്. മക്കളില്ല. ഡല്‍ഹി പൊലീസ് ഇന്‍ക്വസ്റ്റ് നടത്തി ഇരുവരുടെയും മൃതദേഹങ്ങള്‍ പോസ്റ്റ്‌മോര്‍ട്ടത്തിനായി ഡല്‍ഹി സദര്‍ ബസാറിലെ മോര്‍ച്ചറിയിലേക്ക് മാറ്റി. മൃതദേഹങ്ങള്‍ ഡല്‍ഹിയിലെത്തിയ ബന്ധുക്കള്‍ക്ക് വിട്ടുകൊടുക്കും.
