സമ്പന്നരായ വിദേശ നിക്ഷേപകരെ രാജ്യത്തേക്ക് ആകര്‍ഷിക്കുന്നതിനായി പുതിയ നിക്ഷേപക വിസ പദ്ധതി കൊണ്ടുവരുന്ന കാര്യം ബ്രിട്ടീഷ് സര്‍ക്കാര്‍ പരിഗണിക്കുന്നു. ഒക്ടോബറിലെ ബജറ്റിന് മുന്നോടിയായി നിക്ഷേപം വര്‍ധിപ്പിക്കാനും സാമ്പത്തിക വളര്‍ച്ചയ്ക്ക് വേഗം കൂട്ടാനുമുള്ള നടപടികളുടെ ഭാഗമായാണ് നീക്കം.
2022ല്‍ നിര്‍ത്തലാക്കിയ നിക്ഷേപക വിസ പദ്ധതി വീണ്ടും കൊണ്ടുവരുന്നതാണ് സര്‍ക്കാര്‍ പരിഗണിക്കുന്നതെന്ന് ബ്ലൂംബെര്‍ഗ് റിപ്പോര്‍ട്ട് ചെയ്തു. എന്നാല്‍ ഇക്കാര്യത്തില്‍ അന്തിമ തീരുമാനമെടുത്തിട്ടില്ല.
നിക്ഷേപക വിസ നിലവിലില്ലാത്തത് സമ്പന്നരായ ചില വ്യക്തികള്‍ക്കും സംരംഭകര്‍ക്കും ബ്രിട്ടനില്‍ താമസമാക്കാന്‍ അനുയോജ്യമായ വിസ മാര്‍ഗങ്ങള്‍ കണ്ടെത്തുന്നതില്‍ ബുദ്ധിമുട്ടുണ്ടാക്കുന്നതായി കുടിയേറ്റ നിയമവിദഗ്ധര്‍ ചൂണ്ടിക്കാട്ടുന്നു.
മുന്‍ പ്രധാനമന്ത്രി ബോറിസ് ജോണ്‍സന്റെ നേതൃത്വത്തിലുള്ള കണ്‍സര്‍വേറ്റീവ് സര്‍ക്കാരാണ് 2022ല്‍ നിക്ഷേപക വിസ പദ്ധതി അവസാനിപ്പിച്ചത്. പ്രത്യേകിച്ച് റഷ്യയില്‍ നിന്നുള്ള അപേക്ഷകര്‍ അനധികൃത പണം വെളുപ്പിക്കാന്‍ ഈ പദ്ധതി ദുരുപയോഗം ചെയ്യുമെന്ന ആശങ്കയായിരുന്നു പ്രധാന കാരണം.
വിദേശ നിക്ഷേപം ആകര്‍ഷിക്കേണ്ടതിന്റെ ആവശ്യകതയും കുടിയേറ്റം സംബന്ധിച്ച പൊതുജനങ്ങളുടെ ആശങ്കകളും ഒരേസമയം നേരിടേണ്ട സാഹചര്യത്തിലാണ് ബ്രിട്ടീഷ് സര്‍ക്കാര്‍. പുതിയ പദ്ധതി നടപ്പിലാക്കിയാല്‍ സമ്പന്നരായ വിദേശ നിക്ഷേപകര്‍ക്ക് ബ്രിട്ടനില്‍ താമസിക്കാനുള്ള അവസരങ്ങള്‍ ലഭിക്കും.
