ആരോഗ്യം

ലണ്ടന്‍ : യു.കെയില്‍ പടര്‍ന്നുപിടിച്ച വിന്റര്‍വൈറസ് ബാധ ആരോഗ്യ മേഖലയ്ക്കു വെല്ലുവിളിയാകുന്നു. ഏഴു ലക്ഷം പേര്‍ക്കെങ്കിലും വിന്റര്‍ വോമിറ്റിംഗ് പിടിപെട്ടതായാണ് ആശങ്ക. കഴിഞ്ഞവര്‍ഷത്തെ അപേക്ഷിച്ച് മൂന്നു മടങ്ങുവരെ രോഗബാധ കൂടുതലാണ്. അടുത്ത ഏതാനും ആഴ്ചകള്‍ കൂടി വൈറസ് ബാധ വര്‍ധിക്കും എന്നാണു റിപ്പോര്‍ട്ട്. ഈ വര്‍ഷം വളരെ നേരത്തെ തന്നെ നോറോ വൈറസിന്റെ സാന്നിധ്യം പ്രകടമായിരുന്നു. എന്നാല്‍ എന്‍.എച്ച്.എസിന്റെ അറിവില്ലായ്മ മൂലം ആണ് രോഗബാധ ഇത്രയും പടര്‍ന്നു പിടിച്ചതെന്ന് വിദഗ്ധര്‍ പറയുന്നു.

ജൂലൈ മുതല്‍ 2313 സ്ഥിരീകരിച്ച കേസുകള്‍ റിപ്പോര്‍ട്ട് ചെയ്തിരുന്നു. കഴിഞ്ഞവര്‍ഷം ഇതേ സമയത്ത് ഉണ്ടായിരുന്നതിനെക്കാള്‍ 64 ശതമാനം കൂടുതലാണിത്. വൈറസ് ബാധയേറ്റ ഭൂരിഭാഗം പേരും ഡോക്ടര്‍മാരെ കാണാന്‍ മുതിര്‍ന്നിട്ടില്ല. അതുകൊണ്ടു തന്നെ സ്ഥിരീകരിച്ച കേസുകള്‍ കുറവാണ്. സമ്മര്‍ മുതല്‍ മുതിര്‍ന്നവര്‍ക്കും കുട്ടികള്‍ക്കുമായി ഏഴു ലക്ഷം പേര്‍ക്ക് വൈറസ് ബാധ ഉണ്ടായെന്നു ഹെല്‍ത്ത് പ്രൊട്ടക്ഷന്‍ ഏജന്‍സി പുറത്തുവിട്ട കണക്കുകളില്‍ പറയുന്നു.

ശൈത്യത്തിനു പിന്നാലെ യു.കെയില്‍ പടര്‍ന്നുപിടിച്ച വിന്റര്‍ വൊമിറ്റിംഗ് ജനങ്ങള്‍ക്ക് തിരിച്ചടിയായി. ആയിരക്കണക്കിന് കുട്ടികളിലും വൃദ്ധരിലുമായി തുടങ്ങിയ വിന്റര്‍വൈറസ് ആശുപത്രി ജീവനക്കാരിലെയ്ക്കും പടര്‍ന്നിരിക്കുകയാണ്. ഇത് നിമിത്തം ഡസന്‍ കണക്കിന് ആശുപത്രി വാര്‍ഡുകള്‍ അടച്ചു പൂട്ടിയതായി ഹെല്‍ത്ത് പ്രൊട്ടക്ഷന്‍ ഏജന്‍സി റിപ്പോര്‍ട്ടില്‍ പറയുന്നു. കഴിഞ്ഞ അഞ്ചു വര്‍ഷത്തിനിടയിലെ ഏറ്റവും ഉയര്‍ന്ന നിലയില്‍ ആണ് രോഗികളുടെ എണ്ണം.

വയറിളക്കത്തിനും ഛര്‍ദിക്കും കാരണമാക്കുന്ന നോറോ വൈറസ് സാന്നിധ്യം ഈ വര്‍ഷമാദ്യം മുതല്‍ക്കേ കണ്ടെത്തിയിരുന്നുവെങ്കിലും മഞ്ഞുകാലത്തോടെ സ്ഥിതിഗതികള്‍ കൂടുതല്‍ മോശമായി. ജീവനക്കാരുടെ കുറവ് മൂലം ബുദ്ധിമുട്ടുന്ന ആശുപത്രികളില്‍ വിന്റര്‍വൈറസ് ബാധ കൂനിന്മേല്‍ കുരുവായി. ആശുപത്രി ജീവനക്കാര്‍ക്കും രോഗം പിടിപ്പെട്ടതോടെ ഡിപ്പാര്‍ട്ട്‌മെന്റുകള്‍ അടച്ചിടെണ്ടി വന്നിരിക്കുകയാണ്. എന്‍ എച്ച് എസ് ട്രസ്റ്റുകളിലും രോഗം റിപ്പോര്‍ട്ട് ചെയ്യപ്പെട്ടു.

രോഗം പടരാതിരിക്കുന്നതിനുള്ള മുന്‍കരുതലായി 45 ആശുപത്രികളിലെ വാര്‍ഡുകള്‍ അടച്ചിട്ടിരുന്നു. രോഗികളും അവരുടെ സന്ദര്‍ശകരും ജീവനക്കാരുമൊക്കെയാണ് ആശുപത്രികളില്‍ ഛര്‍ദിക്ക് കാരണമാകുന്ന നോറോവൈറസ് എത്തിക്കുന്നത്. സ്‌കൂളുകളില്‍ പൊട്ടിപ്പുറപ്പെടുന്നതാണ് രോഗം പെട്ടെന്ന് വ്യാപിക്കുന്നതിനുള്ള മറ്റൊരു കാരണം. രോഗികള്‍ ഛര്‍ദിക്കുമ്പോള്‍ ആ മുറിയിലുണ്ടാകുന്ന എല്ലാവരിലും അത് പടരുന്നു.

രോഗി തൊടുന്ന ലിഫ്റ്റ് ബട്ടന്‍, കമ്പ്യൂട്ടര്‍ കീ ബോര്‍ഡ്, ഡോര്‍ ഹാന്‍ഡില്‍ തുടങ്ങിയവയില്‍ 12 മണിക്കൂറിനുള്ളില്‍ മറ്റൊരാള്‍ സ്പര്‍ശിച്ചാല്‍ രോഗം ബാധിക്കും. ഛര്‍ദി, വയറിളക്കം, തലവേദന, പനി എന്നിവയാണ് ലക്ഷണങ്ങള്‍. എളുപ്പം പടര്‍ന്നുപിടിക്കുന്നതാണ് നോറോവൈറസ്. സാധാരണഗതിയില്‍ രണ്ടോ മൂന്നോ ദിവസങ്ങള്‍ക്കുള്ളില്‍ രോഗം മാറും. എന്നാല്‍ മറ്റു രോഗങ്ങളമായി ഗുരുതരാവസ്ഥയില്‍ കിടക്കുന്നവര്‍ക്കും വൃദ്ധര്‍ക്കും ഇത് മാരകമാകും. പ്രതിവര്‍ഷം 6 ലക്ഷം പേര്‍ക്ക് രോഗബാധ ഉണ്ടാവാറുണ്ട്. ഇതില്‍ 80 മരണം വീതമാണ് റിപ്പോര്‍ട്ട് ചെയ്യപ്പെടുന്നത്. ധാരാളം വെള്ളം കുടിക്കുകയാണ് രോഗത്തെ പ്രതിരോധിക്കാനുള്ള പ്രധാന മാര്‍ഗം.

വൈറസ് ബാധിച്ചതായി തോന്നിയാല്‍ കൈകള്‍ കഴുകിക്കൊണ്ടിരിക്കുക. ഭക്ഷണമുണ്ടാക്കുന്നതിനും കഴിക്കുന്നതിനും മുമ്പ് കൈകള്‍ സോപ്പിട്ടു വൃത്തിയായി കഴുകണം. കുറഞ്ഞത് 48 മണിക്കൂറെങ്കിലും വീടിനുള്ളില്‍ത്തന്നെ കഴിയണം. കൈകള്‍ വൃത്തിയായി സൂക്ഷിക്കുക, ആരോഗ്യമുള്ള ഭക്ഷണക്രമം പിന്തുടരുക എന്നിവ മാത്രമാണ് പ്രതിരോധമെന്ന് ആരോഗ്യ പ്രവര്‍ത്തകര്‍ പറഞ്ഞു. യു.കെയുടെ ചില ഭാഗങ്ങളില്‍ പതിവിലും നേരത്തേതന്നെ മഞ്ഞുവീഴ്ച്ച ആരംഭിച്ചതാണ് രോഗം പടരാന്‍ കാരണം എന്നാണു വിലയിരുത്തല്‍.