കട്ടന്ചായ കുടിക്കുന്നതും അത് ശീലമാക്കുന്നതും ശരീരത്തിന് നല്ലതല്ലെന്ന് നേരത്തെ ഒരു പ്രചാരണമുണ്ടായിരുന്നു. എന്നാല് രോഗപ്രതിരോധത്തിന് സഹായിക്കുന്ന ഘടകങ്ങള് ഉള്ളതിനാല് ദിവസവും ഒരു കട്ടന് അടിക്കുന്നത് നല്ലതാണെന്ന് കണ്ടെത്തിയിരുന്നു. ഇപ്പോഴിതാ ഒരു പടി കൂടി കടന്ന് കട്ടന്ചായ ദിവ്യവൗഷധം ആയി പ്രവര്ത്തിക്കുന്നു എന്ന് കണ്ടെത്തിയിരിക്കുന്നു. അമിത മദ്യപാനം കൊണ്ടുണ്ടാകുന്ന അള്സറിന് കട്ടന്ചായ ഉത്തമ പ്രതിരോധമെന്ന് പഠനം കണ്ടെത്തി. ഇന്ത്യന് ഇന്സ്റ്റിറ്റിയൂട്ട് ഓഫ് കെമിക്കല് ബയോളജിയിലെ ശാസ്ത്രജ്ഞരാണ് ഇക്കാര്യം കണ്ടെത്തിയത്.
നിരന്തര മദ്യപാനം കുടലിനെ സാരമായിത്തന്നെ ബാധിക്കുന്നുണ്ട്. ഇതാണ് വയര് പുകച്ചിലായും പുളിച്ചുതികട്ടലായും അനുഭവപ്പെട്ട് പിന്നീട് ഗുരുതരമായ പുണ്ണ് ആയി മാറുന്നത്. മദ്യപാനം തുടരുന്നതിനാല് ശരീരത്തിന് ഇത് പ്രതിരോധിക്കാന് കഴിയാതെയും വരുന്നു.
കട്ടന്ചായയിലെ ദ്രവരൂപത്തിലുള്ള ചിലഘടകങ്ങള്ക്ക് ഈ അവസ്ഥയില് പ്രോട്ടീനുമായി ചേര്ന്ന് പ്രതിരോധം തീര്ക്കാനാവുമെന്ന് കണ്ടതായി ബയോടെക്നോളജി വിഭാഗത്തിലെ ശാസ്ത്രജ്ഞന് അനിര്ബന് റോയ് കൊല്ക്കത്തയില് നടന്ന അന്താരാഷ്ട്ര സമ്മേളനത്തിലാണ് വെളിപ്പെടുത്തിയത്. മദ്യം നശിപ്പിച്ച സെല്ലുകള് പുനരുജ്ജീവിപ്പിക്കാനും ഇതിന് കഴിയും. അതുകൊണ്ട് മദ്യപാനികള്ക്കും ഇത് നല്ലതാണ്.
