ലണ്ടന് : ബ്രക്സിറ്റ് ഏല്പ്പിച്ച ആഘാതം മൂലം ഇടിഞ്ഞു താഴ്ന്ന പൗണ്ടിന് അപ്രതീക്ഷിത മുന്നേറ്റം. രൂപക്കെതിരെയും ഡോളറിനെതിരെയും പൗണ്ട് മൂല്യം ശക്തമായ നിലയിലെത്തി. രൂപക്കെതിരെ 86 പിന്നിട്ട മൂല്യം ഡോളറിനെതിരെ 1.34 എന്ന നിലയിലാണ്. എന്നാല് യൂറോയുമായുള്ള വിനിമയ നിരക്ക് 1.12 ആണ്.ഒരു വര്ഷത്തിനിടെ ആദ്യമായാണ് പൗണ്ട് വില ഡോളറിനെതിരെ ഇത്രയധികം വര്ധിക്കുന്നത്. ഇതോടെ നാട്ടിലേക്കുള്ള പണമയക്കല് കൂടും.
അടിസ്ഥാനപലിശനിരക്ക് വൈകാതെ വര്ധിപ്പിച്ചേക്കുമെന്ന് ബാങ്ക് ഓഫ് ഇംഗ്ലണ്ട് സൂചന നല്കിയതിന്റെ ഫലമായി പൗണ്ട് വില കുതിച്ച് കയറാന് തുടങ്ങിയെതെന്നാണ് റിപ്പോര്ട്ട്. തുടര്ച്ചയായുള്ള വിലയിടിവിന് ശേഷം പൗണ്ട് വില കയറിയത് പ്രവാസികളെ സംബന്ധിച്ചിടത്തോളം ആശ്വാസകരമാണെങ്കിലും അടിസ്ഥാനപലിശനിരക്ക് വര്ധിപ്പിച്ചാല് മോര്ട്ട്ഗേജ് എടുത്തിരിക്കുന്ന മലയാളികളടക്കമുള്ള നിരവധി പേരുടെ തിരിച്ചടവ് വര്ധിക്കും.
ഉയര്ന്ന പണപ്പെരുപ്പ നിരക്കും സമ്പദ് വ്യവസ്ഥയുടെ വളര്ച്ചയും മൂലം വൈകാതെ അടിസ്ഥാന പലിശനിരക്ക് വര്ധിപ്പിക്കാമെന്നാണ് ബാങ്ക് ഓഫ് ഇംഗ്ലണ്ട് സൂചന നല്കിയിരിക്കുന്നത്. എന്നാല് ബാങ്ക് ഓഫ് ഇംഗ്ലണ്ടിന്റെ വാഗ്ദാനം ഓഹരി വിപണിയില് വലിയ ചലനങ്ങളൊന്നുമുണ്ടാക്കിയിരുന്നില്ല.
