ലണ്ടന് : ബ്രക്സിറ്റ്ഫലത്തോടെ ഇടിഞ്ഞു താഴ്ന്ന പൗണ്ട് മൂല്യം പഴയ നിലയ്ക്ക്. രൂപക്കെതിരെ പൗണ്ട് മൂല്യം 95 ലേക്ക് ആണ് നീങ്ങുന്നത്. 94.24 ആണ് ചൊവ്വാഴ്ചത്തെ നിരക്ക്. ആളുകള്ക്ക് 94 നടുത്തു കിട്ടുന്നുണ്ട്. ഏതാനും ദിവസങ്ങളായി പൗണ്ടിന് നല്ല സമയമാണ്. സിറിയയിലെ ആക്രമണമൊന്നും പൗണ്ടിനെ ബാധിച്ചില്ല.
നീണ്ട അനിശ്ചിതത്വങ്ങള്ക്കു ഒടുവില് രണ്ടര മാസം മുമ്പാണ് രൂപക്കെതിരെ പൗണ്ട് മൂല്യം 90 ലെത്തിയത്. ബ്രക്സിറ്റ് വിഷയത്തില് ഏകദേശ ധാരണയായിട്ടും പൗണ്ടിന് ക്ഷീണം ഉണ്ടായില്ല. കൂടാതെ സമ്പദ് വ്യവസ്ഥ വളര്ച്ചയിലേക്കെന്ന പ്രവചനവും പൗണ്ടിന്റെ മൂല്യം കൂട്ടി. നീണ്ട 20മാസത്തെ ഇടവേളയ്ക്കു ശേഷം ആണ് പൗണ്ടിന് ഇത്ര മുന്നേറ്റം. പൗണ്ട് മൂല്യം പഴയതുപോലെ മൂന്നക്കത്തിലെത്തുമെന്നാണ് പ്രതീക്ഷ.
ഡോളറിനെതിരെയും പൗണ്ട് മൂല്യം ശക്തമായ നിലയിലാണ്. ഡോളറിനെതിരെ 1.43 എന്ന നിലയിലാണ്. യൂറോയുമായുള്ള വിനിമയ നിരക്ക് 1.15 ആണ്. തുടര്ച്ചയായുള്ള വിലയിടിവിന് ശേഷം പൗണ്ട് വില കയറിയത് പ്രവാസികളെ സംബന്ധിച്ചിടത്തോളം ആശ്വാസകരമാണെങ്കിലും അടിസ്ഥാനപലിശനിരക്ക് വര്ധിപ്പിച്ചാല് മോര്ട്ട്ഗേജ് എടുത്തിരിക്കുന്ന മലയാളികളടക്കമുള്ള നിരവധി പേരുടെ തിരിച്ചടവ് വര്ധിക്കും.
ഹാര്ഡ് ബ്രക്സിറ്റ് ഉണ്ടാവില്ലെന്ന സൂചനയും യൂറോപ്യന് പൗരന്മാരുടെ കാര്യത്തില് കടുത്ത നിലപാട് ഉണ്ടാവില്ലെന്നതും പൗണ്ടിന്റെ മുന്നേറ്റത്തിന് കാരണമായി.
ബ്രക്സിറ്റ് ഫലം വന്ന 2016 ജൂണ് 23നു ശേഷം ശേഷം പൗണ്ട് 25 ശതമാനത്തോളം ആണ് ഇടിഞ്ഞത്. പൗണ്ടിന്റെ മൂല്യം 79 രൂപ വരെയെത്തിയിരുന്നു. 78 പോലും കിട്ടിയിരുന്നില്ല. ഒരു പൗണ്ടിന് 25 രൂപയിലേറെ നഷ്ടമാണ് യുകെയിലെ ഇന്ത്യന് സമൂഹത്തിനുണ്ടായത്. 104 -105 രൂപ ലഭിച്ചിരുന്ന സ്ഥാനത്തായിരുന്നു അത്. പ്രവാസി നിക്ഷേപത്തെയും നാട്ടിലേക്കുള്ള പണമയക്കലിനെയും ഇത് പ്രതികൂലമായി ബാധിച്ചു. ബ്രിട്ടണ് യൂറോപ്പിന് പുറത്തേയ്ക്കു പോകാനുള്ള നടപടിക്ക് തുടക്കം കുറിച്ചപ്പോഴും പൗണ്ടിന് സമയം മോശമായിരുന്നു. ഡോളറിനെതിരെ 1.20 വരെ മൂല്യം താഴ്ന്നിരുന്നു. മൂല്യം കൂടിയതോടെ നാട്ടിലേക്കുള്ള പണമയക്കല് കൂടും.
