ന്യൂഡല്ഹി: അതിതീവ്രമായ ഫോനി ചുഴലിക്കാറ്റ് ഒഡീഷ തീരത്ത് ആഞ്ഞടിക്കുന്നതായി റിപ്പോര്ട്ടുകള്. ഇപ്പോള് ഗോപാല്പൂരില് നിന്ന് 65 കിലോമീറ്റര് അകലെയാണ് ചുഴലിക്കാറ്റിന്റെ സ്ഥാനം. രാവിലെ എട്ടിനും പത്തിനുമിടയ്ക്ക് പുരി നഗരത്തിന് സമീപത്തെ ഗോപാല്പൂര്, ചന്ദ്ബലി തീരങ്ങളിലായിരിക്കും കൊടുങ്കാറ്റ് കരതൊടുകയെന്നാണ് ഇന്ത്യന് കാലാവസ്ഥ നിരീക്ഷണ കേന്ദ്രം അറിയിച്ചിരിക്കുന്നത്. മണിക്കൂറില് 170-200 കിലോമീറ്റര് വേഗതയുണ്ടാകുമെന്ന മുന്നറിയിപ്പിനെ തുടര്ന്ന് ഒഡീഷയിലെ 14 ജില്ലകളിലുള്ള 12 ലക്ഷം ആളുകളെ സുരക്ഷിത സ്ഥാനങ്ങളിലേക്ക് ഒഴിപ്പിച്ചു. 900 ദുരിതാശ്വാസ ക്യാമ്പുകള് തുറന്നിട്ടുണ്ട്.
ഒഡീഷയ്ക്ക് പുറമെ ബംഗാള്, ആന്ധ്ര സംസ്ഥാനങ്ങളിലും കനത്ത ജാഗ്രത നിര്ദ്ദേശം നല്കിയിട്ടുണ്ട്. ഒഡീഷയില് ഇതുവരെ പതിനൊന്നര ലക്ഷം ആളുകളെ ഒഴിപ്പിച്ചു . ഒഡീഷയില് 13 ജില്ലകളില് റെഡ് അലര്ട്ട് നല്കിയിട്ടുണ്ട്. കൊടുങ്കാറ്റ് ബാധിയ്ക്കുന്ന പ്രദേശങ്ങളില്നിന്ന് ഒഴിഞ്ഞുപോകാന് സര്ക്കാര് നിര്ദേശം നല്കിയതായി അധികൃതര് അറിയിച്ചു. കരതൊട്ടതിന് ശേഷം ഒഡിഷ തീരത്ത് നിന്ന് ബംഗാളിലേക്കും അവിടെനിന്ന് ബംഗ്ലാദേശിലേക്കും നീങ്ങും. 90-100 കിലോമീറ്റര് വേഗതയിലായിരിക്കും ബംഗാളില് കൊടുങ്കാറ്റ് വീശുക
ഒഡീഷയിലെ ഗന്ജം, ഗജപതി, പുരി, ഖുര്ദ, നയഗഢ്, കട്ടക്ക്, ധന്കനല്, ജഗത് സിങ് പൂര്, കേന്ദ്രപര, ജജ്പൂര്, കിയോഞ്ചര്, ഭദ്രക്, ബാലസോര്, മയൂര്ഭഞ്ച് തുടങ്ങിയ 14 ജില്ലകളിലെ 10000 ഗ്രാമങ്ങളെയും 54 നഗരങ്ങളെയും കൊടുങ്കാറ്റ് ബാധിക്കും. ബംഗാളില് പുര്ബ, പശ്ചിം,മേദിനിപൂര്, വടക്ക്, കിഴക്ക് സൗത്ത് 24 പര്ഗനാസാ, കൊല്ക്കത്ത എന്നിവിടങ്ങളിലും ബാധിക്കും. ആന്ധ്രപ്രദേശിലെ ശ്രീകാകുളം, വിജയനഗരം, വിശാഖപട്ടണം ജില്ലകളെയും ചുഴലിക്കാറ്റ് ബാധിക്കും.
ചുഴലിക്കാറ്റ് സംസ്ഥാനത്തെ വ്യോമ, റെയില് ഗതാഗത മാര്ഗങ്ങളെ ഉള്പ്പെടെ ബാധിച്ചേക്കുമെന്നാണ് വിലയിരുത്തുന്നത്. മുന് കരുതലിന്റെ ഭാഗമായി സര്വ്വീസുകള് റദ്ദാക്കി. വ്യാഴാഴ്ച രാത്രി മുതല് 24 മണിക്കൂര് വരെ ഭുവനേശ്വറിലെ ബിജു പട്നായിക് അന്താരാഷ്ട്ര വിമാനത്താവളവും കൊല്ക്കത്ത അന്താരാഷ്ട്ര വിമാനത്താവളവും അടച്ചിട്ടു. കൊല്ക്കത്ത ചെന്നൈ റൂട്ടിലുള്ള എക്സ്പ്രസ് ട്രെയിനുകള് അടക്കം 150 ഓളം റെയില് സര്വ്വീസുകളും താത്കാലികമായി റദ്ദാക്കിയിട്ടുണ്ട്. ഒഡീഷയിലെ പ്രധാന വിനോദ സഞ്ചാര കേന്ദ്രമായ പുരിയില് നിന്നും അടിയന്തിരമായി പിന്വാങ്ങാന് ടൂറിസ്റ്റുകള്ക്കും മുന്നറിയിപ്പ് നല്കിയിട്ടുണ്ട്.
