ന്യൂഡല്ഹി: ഒരു വര്ഷം പിന്നിട്ട കര്ഷകരുടെ ഐതിഹാസിക സമരത്തിന് മുന്നില് മുട്ടുമടക്കിയ മോദി സര്ക്കാര് വിവാദമായ മൂന്ന് കാര്ഷിക നിയമങ്ങകളും പിന്വലിച്ചു. പിന്വലിക്കാന് തീരുമാനിച്ചതായി പ്രധാനമന്ത്രി നരേന്ദ്ര മോദിയാണ് പ്രഖ്യാപിച്ചത്. ഗുരു നാനാക്ക് ദിനത്തോടനുബന്ധിച്ച് രാജ്യത്തെ അഭിസംബോധന ചെയ്ത് സംസാരിക്കവേയായിരുന്നു പ്രഖ്യാപനം.
നിയമങ്ങള് പിന്വലിക്കാനുള്ള ബില് ലോക്സഭയിലും രാജ്യസഭയിലും കേന്ദ്രം പാസാക്കി. ബില്ലില് ചര്ച്ച വേണമെന്ന പ്രതിപക്ഷത്തിന്റെ ആവശ്യം അംഗീകരിച്ചില്ല. ഇരു സഭകളിലും പ്രതിപക്ഷം ബഹളം വച്ചു. ലോക്സഭയിലും രാജ്യസഭയിലും പ്രതിപക്ഷ ബഹളത്തിനിടെ ശബ്ദവോട്ടോടെയാണ് ബില് പാസാക്കിയത്. കൃഷിമന്ത്രി നരേന്ദ്ര സിങ് തോമറാണ് കാര്ഷിക നിയമങ്ങള് പിന്വലിക്കാനുള്ള ബില് അവതരിപ്പിച്ചത്. രാഷ്ട്രപതി ഒപ്പിടുന്നതോടെ നിയമം ഔദ്യോഗികമായി റദ്ദാകും.
ഏറെ പ്രതിഷേധങ്ങള്ക്കും സമരങ്ങള്ക്കുമൊടുവില് ഈ മാസം 19നാണ് മൂന്ന് കാര്ഷിക നിയമങ്ങളും പിന്വലിക്കുകയാണെന്ന് പ്രധാനമന്ത്രി നരേന്ദ്ര മോദി പ്രഖ്യാപിച്ചത്. കര്ഷക സമരം ശക്തമായി തുടരുന്ന പശ്ചാത്തലത്തില് നിയമം പാസാക്കി ഒരു വര്ഷത്തിന് ശേഷമാണ് പ്രധാനമന്ത്രിയുടെ അപ്രതീക്ഷിത പ്രഖ്യാപനം. ഗുരു നാനാക്ക് ദിനത്തോടനുബന്ധിച്ച് രാജ്യത്തെ അഭിസംബോധന ചെയ്ത് സംസാരിക്കവേയായിരുന്നു പ്രഖ്യാപനം.
പഞ്ചാബ്, ഹരിയാന തുടങ്ങീ സംസ്ഥാനങ്ങളില് നിന്നുള്ള കര്ഷകര് നിയമങ്ങള്ക്കെതിരായ സമരം തുടരുന്നതിനിടെയായിരുന്നു പിന്വലിക്കല് പ്രഖ്യാപനം. കഴിഞ്ഞ ഒരു വര്ഷക്കാലത്തിലേറയായി കര്ഷകര് സമരത്തിലാണ്.
2020 നവംബര് 26നായിരുന്നു കാര്ഷിക നിയമങ്ങള്ക്കെതിരെ വിവിധ സംസ്ഥാനങ്ങളില് നിന്നുള്ള കര്ഷകര് സമരമാരംഭിച്ചത്. ഇക്കഴിഞ്ഞ ജനുവരി 22നായിരുന്നു കേന്ദ്രസര്ക്കാര് അവസാനമായി കര്ഷകരുമായി ചര്ച്ച നടത്തിയിരുന്നത്.
സമരം ഒരു വര്ഷം തികയ്ക്കുന്നതിന് തൊട്ടുമുമ്പാണ് പ്രധാനമന്ത്രിയുടെ പ്രഖ്യാപനം വന്നത്. വിവാദമായ മൂന്ന് കാര്ഷിക നിയമങ്ങള് പിന്വലിക്കാന് കര്ഷക സമരം ഒരു വര്ഷം തികയ്ക്കുന്ന നവംബര് 26 വരെയാണ് സര്ക്കാരിന് സമയം കൊടുത്തിരിക്കുന്നതെന്ന് ഭാരതീയ കിസാന് യൂണിയന് നേതാവ് രാകേഷ് ടികായത് പറഞ്ഞിരുന്നു.
അന്തര്ദേശീയ ശ്രദ്ധനേടിയ സമരമായിരുന്നു കര്ഷകരുടേത്. ചൂടും മഞ്ഞും വകവയ്ക്കാതെ അവര് പോരാടി. സമരം ചെങ്കോട്ടയിലേയ്ക്ക് വരെ നീണ്ടു. യുപി അടക്കമുള്ള സംസ്ഥാനങ്ങളിലേക്ക് തിരഞ്ഞെടുപ്പ് നടക്കാനിരിക്കെയാണ് ഗത്യന്തരമില്ലാതെ മോദി സര്ക്കാരിന്റെ കീഴടങ്ങല്.
