തിരുവനന്തപുരം: പ്രേംനസീറിന്റെ മകനും നടനുമായ ഷാനവാസ് (71) അന്തരിച്ചു. നായക, വില്ലന്വേഷങ്ങളില് തിളങ്ങിയ ഷാനവാസിനെ തിങ്കളാഴ്ച രാത്രി ഏഴുമണിയോടെ തിരുവനന്തപുരത്തെ സ്വകാര്യ ആശുപത്രിയില് പ്രവേശിപ്പിച്ചെങ്കിലും 12 മണിയോടെ മരിച്ചു. വൃക്കരോഗത്തിനു ചികിത്സയിലായിരുന്നു. വഴുതക്കാട് ആകാശവാണിക്കു സമീപം ഫ്ളാറ്റിലായിരുന്നു താമസം.
മലയാളം, തമിഴ് ഭാഷകളിലായി 96 സിനിമകളില് അഭിനയിച്ചിട്ടുണ്ട്. ബാലചന്ദ്രമേനോന് സംവിധാനം ചെയ്ത ‘പ്രേമഗീതങ്ങളി’ലൂടെയാണ് ഷാനവാസ് സിനിമയിലെത്തുന്നത്. ‘മണിത്താലി,’, ‘ഗാനം’, ‘ഹിമം’, ‘ചൈനാ ടൗണ് ’, ‘ചിത്രം’, കോരിത്തരിച്ച നാള് തുടങ്ങിയവയാണ് അഭിനയിച്ച ചിത്രങ്ങളില് ചിലത്. ‘ഇവന് ഒരു സിംഹം’ എന്ന സിനിമയില് ആദ്യമായി നസീറിനൊപ്പം അഭിനയിച്ചു. തുടര്ന്ന് ഏഴ് സിനിമകളില് പിതാവും മകനും ഒന്നിച്ചു. ‘ജനഗണമന’യാണ് അവസാന ചിത്രം.
ഇരുപത്തഞ്ചോളം സിനിമകളില് നായകനായി. ഒട്ടേറെ ചിത്രങ്ങളില് വില്ലനും. ടെലിവിഷന് സീരിയലുകളിലും വേഷമിട്ടു.
പരേതയായ ഹബീബ ബീവിയാണ് മാതാവ്. ഭാര്യ: ആയിഷാബീവി. മക്കള്: അജിത്ഖാന്(ദുബായ്), ഷമീര്ഖാന്. മരുമകള്: ഹന(കൊല്ലം). സഹോദരങ്ങള്: ലൈല, റസിയ, റീത്ത. ചൊവ്വാഴ്ച വൈകീട്ട് മൃതദേഹം പാളയം ജുമാമസ്ജിദിലേക്ക് എത്തിക്കും. തുടര്ന്ന് അഞ്ചുമണിയോടെ കബറടക്കം.
