റീലീസിനു മുമ്പ് വിജയ് ചിത്രം 'ജനനായകന്' ഫുള് എച്ച്ഡി പതിപ്പ് പുറത്തായി
ടിവികെ അധ്യക്ഷന് വിജയ് നായകനായ ജനനായകന് റീലീസിനു മുമ്പ് പൈറേറ്റഡ് സൈറ്റില്. റിലീസാവാത്ത ചിത്രത്തിന്റെ ഫുള് എച്ച്ഡി പ്രിന്റാണ് അപ്ലോഡ് ചെയ്തത്. ആദ്യം പുറത്ത് വന്നത് ചിത്രത്തിലെ ചില ദൃശ്യങ്ങള് മാത്രമായിരുന്നു. പിന്നാലെ മുഴുവന് ചിത്രവും അപ്ലോഡ് ചെയ്തു. ചിത്രത്തിന് ഇനിയും സിബിഎഫ്സി സര്ട്ടിഫിക്കറ്റ് ലഭിച്ചിട്ടില്ല. മൂന്ന് മണിക്കൂര് നീളമുള്ള സിനിമയുടെ പതിപ്പ് പല ഭാഗങ്ങളായി കട്ട് ചെയ്താണ് ഇന്റര്നെറ്റിലൂടെ പ്രചരിക്കുന്നത്.
സിനിമയുടെ ഇന്ട്രോയും ക്ലൈമാക്സും അടക്കമുള്ള രംഗങ്ങളും ഇപ്പോള് സോഷ്യല് മീഡിയയിലൂടെ പ്രചരിക്കുന്നുണ്ട്. റിലീസ് പോലും ചെയ്യാത്ത സിനിമയുടെ പ്രിന്റ് എങ്ങനെ ലീക്ക് ആയെന്നാണ് ഇനി കണ്ടെത്തേണ്ടത്. ആദ്യം പുറത്തുവന്നത് സിനിമയുടെ ആദ്യ 5 മിനുറ്റ് കണ്ടന്റ്. പിന്നാലെ മുഴുവന് ചിത്രവും ഇന്റര്നെറ്റില് എത്തുകയായിരുന്നു.
ആയിരക്കണക്കിന് ആളുകള് ഇതിനോടകം ചിത്രം ഡൗണ്ലോഡ് ചെയ്ത് കഴിഞ്ഞുവെന്നാണ് വിവരം. രാഷ്ട്രീയ പ്രവേശത്തിലേക്ക് കടക്കുന്ന താരത്തിന്റെ അവസാന ചിത്രമാണ് ജനനായകന്. എച്ച് വിനോദ് സംവിധാനം ചെയ്യുന്ന ജനനായകന് ആദ്യ ദിനം വലിയ കളക്ഷന് നേടുമെന്നായിരുന്നു കണക്കുകൂട്ടല്.
സിനിമയ്ക്ക് 'യു/എ' സര്ട്ടിഫിക്കറ്റ് നല്കണമെന്ന സിംഗിള് ബെഞ്ച് ഉത്തരവ് മദ്രാസ് ഹൈക്കോടതി നേരത്തെ റദ്ദാക്കിയിരുന്നു. ഇതിനിടെ സിനിമയുടെ ഒടിടി കരാറില് നിന്ന് ആമസോണ് പിന്മാറി എന്ന റിപ്പോര്ട്ടുകള് വന്നിരുന്നു. സിനിമയുടെ റീലീസ് കാലതാമസമാണ് ഒ ടി ടി ഡീലില് നിന്ന് പിന്മാറാന് ആമസോണ് പ്രൈമിനെ പ്രേരിപ്പിച്ചത്. തെരഞ്ഞെടുപ്പിനു തൊട്ടു മുമ്പ് റിലീസ് ചെയ്തു വിജയ്ക്ക് വലിയ ഹൈപ്പ് നല്കാന് ലക്ഷ്യമിട്ടുള്ള ചിത്രമായിരുന്നു ജനനായകന്.
