യുകെ വീണ്ടും യൂറോപ്യന് യൂണിയനില് ചേരുന്നതടക്കമുള്ള എല്ലാ സാധ്യതകളും പരിഗണനയിലുണ്ടാകുമെന്ന് വിദേശകാര്യ സെക്രട്ടറി എഡ് മിലിബാന്ഡ്. ബ്രസല്സില് യൂറോപ്യന് നേതാക്കളുമായി ആന്ഡി ബേണ്ഹാം നടത്തുന്ന അനൗദ്യോഗിക ചര്ച്ചകളില് ഇക്കാര്യം ഉള്പ്പെട്ടേക്കാമെന്നും അദ്ദേഹം വ്യക്തമാക്കി.
വ്യാപാരം, യുവജനങ്ങളുടെ സഞ്ചാരം എന്നിവയുമായി ബന്ധപ്പെട്ട് യൂറോപ്യന് യൂണിയനുമായി ബ്രിട്ടന് പുതിയ കരാറുകളില് എത്തിയതിന് പിന്നാലെയാണ് പ്രതികരണം. ഭക്ഷ്യ-പാനീയ ഉല്പ്പന്നങ്ങളുടെ നിലവാരം, കാര്ബണ് പുറന്തള്ളല് വ്യാപാരം, യുവജനങ്ങളുടെ യാത്രാ-തൊഴില് അവസരങ്ങള് എന്നിവയുമായി ബന്ധപ്പെട്ടതാണ് കരാറുകള്. ഇതനുസരിച്ച് ഒരു ലക്ഷം ബ്രിട്ടീഷ് യുവാക്കള്ക്ക് യൂറോപ്യന് യൂണിയന് രാജ്യങ്ങളില് താമസിക്കാനും ജോലി ചെയ്യാനും പഠിക്കാനും യാത്ര ചെയ്യാനും അവസരം ലഭിക്കും. സമാനമായ സൗകര്യം യൂറോപ്യന് യുവാക്കള്ക്കും ബ്രിട്ടനില് ലഭിക്കും.
പുതിയ കരാര് ബ്രിട്ടന്റെ മൊത്ത ആഭ്യന്തര ഉല്പ്പാദനത്തില് 0.5 ശതമാനം വര്ധനയുണ്ടാക്കുമെന്നും സമ്പദ്വ്യവസ്ഥയ്ക്ക് 17 ബില്യണ് പൗണ്ടിന്റെ നേട്ടമുണ്ടാക്കുമെന്നും ആന്ഡി ബേണ്ഹാം അവകാശപ്പെട്ടിരുന്നു.
അടുത്ത ഒരു വര്ഷത്തിനുള്ളില് യൂറോപ്യന് യൂണിയനുമായി കൂടുതല് സാധ്യതകള് ചര്ച്ച ചെയ്യുമെന്ന് മിലിബാന്ഡ് പറഞ്ഞു. എന്നാല് അടുത്ത പൊതുതെരഞ്ഞെടുപ്പിന് മുമ്പ് ഇതില് കൂടുതല് മുന്നോട്ടുപോകാന് കഴിയില്ലെന്നും അദ്ദേഹം വ്യക്തമാക്കി.