വീട്ടില് നില്ക്കാന് താല്പ്പര്യമില്ല; പന്തീരാങ്കാവ് കേസിലെ പരാതിക്കാരി ഡല്ഹിയിലേക്ക് മടങ്ങി
വിവാദമായ പന്തീരാങ്കാവ് ഗാര്ഹിക പീഡന കേസിലെ പരാതിക്കാരിയായ പെണ്കുട്ടി മൊഴി നല്കിയശേഷം ഡല്ഹിയിലേക്ക് മടങ്ങി. ഇന്ന് പുലര്ച്ചെയുള്ള വിമാനത്തിലാണ് മടങ്ങിയത്. ഇന്നലെ രാത്രിയോടെ കൊച്ചിയിലെത്തിയ യുവതിയെ വടക്കേക്കര പൊലീസ് കസ്റ്റഡിയിലെടുത്തിരുന്നു. തുടര്ന്ന് മജിസ്ട്രേറ്റിന് മുന്നില് ഹാജരാക്കി.
വീട്ടുകാരുടെ സമ്മര്ദത്തെ തുടര്ന്നാണ് ഭര്ത്താവിനെതിരെ ആദ്യം പരാതി നല്കിയത് എന്നാണ് യുവതി പൊലീസിന് നല്കിയ പുതിയ മൊഴി. വീട്ടില് നില്ക്കാന് താല്പര്യമില്ലെന്നും ഡല്ഹിയില് പോകണമെന്നും മജിസ്ട്രേറ്റിനോടും യുവതി ആവശ്യപ്പെട്ടു. തുടര്ന്നാണ് നടപടികള് പൂര്ത്തിയാക്കി യുവതിയെ പൊലീസ് വിട്ടയച്ചത്.
പെണ്കുട്ടിയെ കാണാനില്ലെന്ന് വ്യക്തമാക്കി പിതാവ് പരാതി നല്കിയതിനെ തുടര്ന്നാണ് കഴിഞ്ഞ ദിവസം രാത്രി പെണ്കുട്ടിയെ ഡല്ഹിയില് നിന്ന് വിമാന മാര്ഗം കൊച്ചിയില് എത്തിച്ചത്. വീട്ടുകാരുടെ സമ്മര്ദ്ദത്തെ തുടര്ന്നാണ് ഭര്ത്താവിനെതിരെ ഗാര്ഹിക പീഡന പരാതി നല്കിയത് എന്നായിരുന്നു യൂട്യൂബ് ചാനലിലൂടെയുള്ള പെണ്കുട്ടിയുടെ വെളിപ്പെടുത്തല്. എന്നാല് ആരുടെയോ സമ്മര്ദ്ദത്തിനു വഴങ്ങിയാണ് പെണ്കുട്ടി മൊഴി മാറ്റിയതെന്ന് വീട്ടുകാരും ആരോപിച്ചിരുന്നു.
കേസില് നിലപാടു മാറ്റിയ യുവതി ഭര്ത്താവ് രാഹുല് പി ഗോപാലും വീട്ടുകാരും സ്ത്രീധനം ചോദിച്ചിട്ടില്ലെന്നു പറഞ്ഞു കഴിഞ്ഞ ദിവസം സമൂഹമാധ്യമങ്ങളില് വിഡിയോ പോസ്റ്റ് ചെയ്തിരുന്നു.
യുവതിയെ തട്ടിക്കൊണ്ടുപോയി ഭീഷണിപ്പെടുത്തി പറയിപ്പിച്ചതാകാമെന്നു പെണ്കുട്ടിയുടെ വീട്ടുകാര് പ്രതികരിച്ചപ്പോള്, തന്നെ ആരും തട്ടിക്കൊണ്ടു പോയിട്ടില്ലെന്നും നിലപാടു മാറ്റാന് പ്രേരിപ്പിച്ചിട്ടില്ലെന്നും പറഞ്ഞു മറ്റൊരു വിഡിയോയും യുവതി പോസ്റ്റ് ചെയ്തു. മകള് സ്വന്തമായി ഇത്തരത്തില് മാറ്റിപ്പറയുമെന്നു കരുതുന്നില്ലെന്നും പെണ്കുട്ടി രാഹുലിന്റെ ആളുകളുടെ കസ്റ്റഡിയിലാണെന്നും അവര് നിര്ബന്ധിച്ചു പറയിപ്പിക്കുന്നതാണെന്നുമാണു വിശ്വസിക്കുന്നതെന്നും പെണ്കുട്ടിയുടെ പിതാവ് പറഞ്ഞു.
തിരുവനന്തപുരം, കോഴിക്കോട് സൈബര് പൊലീസ് സംഘങ്ങളാണ് യുവതിക്കായി അന്വേഷണം നടത്തിയിരുന്നത്. പല ലോക്കേഷനുകളില് നിന്നായാണ് യുവതി മൂന്ന് വിഡിയോകളും അപ്ലോഡ് ചെയ്തതെന്നാണ് പൊലീസ് നേരത്തെ വ്യക്തമാക്കിയിരുന്നത്.
