ഒ.ആര് കേളു മന്ത്രിയായി സത്യപ്രതിജ്ഞ ചെയ്തു ചുമതലയേറ്റു
ഒ.ആര് കേളു മന്ത്രിയായി ചുമതലയേറ്റു. പട്ടികജാതി പട്ടികവര്ഗ ക്ഷേമവകുപ്പ് മന്ത്രിയായാണ് ചുമതലയേറ്റത്. ഗവര്ണര് ആരിഫ് മുഹമ്മദ് ഖാന് കേളുവിന് സത്യവാചകം ചൊല്ലിക്കൊടുത്തു. തിരുവനന്തപുരത്ത് രാജ്ഭവനില് നടന്ന ചടങ്ങില് പ്രതിപക്ഷ നേതാക്കള് ഉള്പ്പെടെ ഉള്ളവര് പങ്കെടുത്തു.
നാല് മണിക്കായിരുന്നു സത്യപ്രതിജ്ഞ ചടങ്ങ് നടന്നത്. വയനാട്ടില്നിന്ന് ബന്ധുക്കളും സുഹൃത്തുക്കളും കേളുവിന്റെ സത്യപ്രതിജ്ഞാ ചടങ്ങിനായി എത്തിയിരുന്നു. മുഖ്യമന്ത്രി പിണറായി വിജയനും പ്രതിപക്ഷ നേതാവ് വിഡി സതീശനും പ്രതിപക്ഷ ഉപനേതാവ് പികെ കുഞ്ഞാലിക്കുട്ടിയും അടക്കമുള്ളവര് സത്യപ്രതിജ്ഞ ചടങ്ങില് പങ്കെടുത്തു.
കെ രാധാകൃഷ്ണന് മന്ത്രിസ്ഥാനം രാജിവച്ചതോടെയാണ് ഒ ആര് കേളുവിനെ മന്ത്രിയാക്കാന് സിപിഎം സംസ്ഥാന നേതൃത്വം തീരുമാനിച്ചത്. ആലത്തൂര് എംപിയായി ലോക്സഭയിലേക്ക് ജയിച്ച സാഹചര്യത്തിലായിരുന്നു കെ രാധാകൃഷ്ണന്റെ രാജി. പട്ടിക വര്ഗ വിഭാഗത്തില് നിന്നുള്ള ആദ്യത്തെ സിപിഎം മന്ത്രിയാണ് കേളു.
പിണറായി സര്ക്കാരില് വയനാട്ടില് നിന്നുള്ള ഏക ക്യാബിനറ്റ് അംഗം കൂടിയാണ്. മന്ത്രിയാകുമെന്ന പ്രഖ്യാപനം കേട്ടശേഷം നാട്ടിലേക്ക് മടങ്ങിയ കേളു ഇന്ന് പുലര്ച്ചെയാണ് തിരുവനന്തപുരത്ത് തിരിച്ചെത്തിയത്. സത്യപ്രതിജ്ഞ കാണാന് കുടുംബവും കൂടെയെത്തിയിരുന്നു. അതേസമയം പടക്കം പൊട്ടിച്ചും അഭിവാദ്യങ്ങള് അര്പ്പിച്ചും വയനാട് സന്തോഷത്തില് പങ്കാളികളായി.
വയനാട്ടിലെ വന്യജീവി ആക്രമണമായി ബന്ധപ്പെട്ട വിഷയങ്ങള് ഗൗരമായി കാണുമെന്ന് മന്ത്രി ഒ.ആര് കേളു. പ്രവര്ത്തനങ്ങളെ ഏകോപിപ്പിക്കുന്നതിനായി പ്രത്യേക ഉദ്യോഗസ്ഥനെ നിയമിച്ച് കമ്മിറ്റി രൂപീകരിച്ച് പ്രവര്ത്തിക്കാനുള്ള നടപടികള് നടക്കുകയാണെന്നും മന്ത്രി പറഞ്ഞു. മന്ത്രിയായി സത്യപ്രതിജ്ഞ ചെയ്തതിന് ശേഷം പ്രതികരിക്കുകയായിരുന്നു മന്ത്രി.
വന്യമൃഗ ശല്യത്തിന് ശാശ്വത പരിഹാരം കാണാന് ശ്രമിക്കും. വന്യജീവി ആക്രമണത്തില് സര്ക്കാര് ഇടപെടല് മുമ്പ് പലതവണ ഉണ്ടായിട്ടുണ്ട്. പ്രശ്നപരിഹാരങ്ങള്ക്ക് വയനാട്ടിലെ എം.എല്.എമാരും എം.പിയുമായി കൂടിയാലോചിക്കും. മന്ത്രിക്ക് മാത്രം വന്യജീവി ആക്രമണങ്ങള്ക്ക് പരിഹാരം കാണാന് കഴിയില്ല. എല്ലാവരും ഒരുമിച്ചുചേര്ന്നുകൊണ്ട് പരിഹാരമുണ്ടാക്കുമെന്നും മന്ത്രി പറഞ്ഞു.
സംസ്ഥാന തല വകുപ്പ് സമിതി വിളിച്ച് ചേര്ത്ത് പട്ടികജാതി-വിഭാഗത്തിലുള്ളവരുടെ ക്ഷേമത്തിനായി പ്രവര്ത്തിക്കുമെന്നും 'കോളനി' പദം മാറ്റുന്നതിനെ പറ്റി അതിന്റെ നിയമവശങ്ങള് പഠിക്കുമെന്നും മന്ത്രി പറഞ്ഞു. വയനാട്ടുകാരുടെ പ്രതീക്ഷക്ക് ഒത്ത് ഉയര്ന്ന് പ്രവര്ത്തിക്കാനാകുമെന്നാണ് പ്രതീക്ഷയെന്നും മന്ത്രി പ്രതികരിച്ചു.
