തിരുവനന്തപുരത്ത് വീട്ടിലെത്തി യുവതിയ്ക്ക് നേരെ സ്ത്രീയുടെ വെടിവയ്പ്പ്; വാഹനത്തിന്റെ നമ്പര് പ്ലേറ്റ് വ്യാജം
തിരുവനന്തപുരത്ത് വഞ്ചൂരിയൂരില് യുവതിയ്ക്ക് നേരെ സ്ത്രീയുടെ എയര്ഗണ് ഉപയോഗിച്ചുള്ള ആക്രമണത്തിന് കാരണം വ്യക്തി വൈരാഗ്യമെന്ന് പ്രാഥമിക നിഗമനം. വെടിയേറ്റ ഷിനിയോടോ, കുടുംബത്തോടോ ഉള്ള വ്യക്തി വൈരാഗ്യം തന്നെയാണ് ആക്രമത്തിന് പിന്നിലെന്നാണ് പൊലീസ് പറയുന്നത്. ഷിനിയുടെ മൊഴിയെടുത്തെങ്കിലും പ്രതിയിലേക്കുള്ള നിര്ണായക സൂചനകള് ലഭിച്ചില്ല. ആക്രമിച്ച സ്ത്രീ വഞ്ചിയൂരുളള വീടും പരിസരവും മനസിലാക്കാന് മുമ്പ് എത്തിയിരുന്നതായും പൊലീസ് സംശയിക്കുന്നു.
വെടിവച്ചതിന് ശേഷം അക്രമിയുടെ കാര് ആറ്റിങ്ങല് ഭാഗത്തേക്കാണ് സഞ്ചരിച്ചിരിക്കുന്നത്. സില്വര് നിറത്തിലുള്ള സെലേറിയോ കാറിലാണ് അക്രമി എത്തിയത്. വ്യാജ നമ്പര് പ്ലേറ്റുപയോഗിച്ചാണ് ദേശീയപാത വഴിയും യത്ര ചെയ്തിരിക്കുന്നത്. പ്രതിയെ പിടികൂടാന് വിവിധ സംഘങ്ങളായി തിരിഞ്ഞുള്ള അന്വേഷണമാണ് നടക്കുന്നത്. അക്രമി എത്തിയ കാറില് പതിച്ചിരുന്ന നമ്പര് സ്വിഫ്റ്റ് കാറിന്റേതാണെന്നും കണ്ടെത്തിയിട്ടുണ്ട്.
പറണ്ടോട് സ്വദേശിയുടെ സ്വിഫ്റ്റ് കാര് മാസങ്ങള്ക്ക് മുമ്പാണ് കോഴിക്കോടേക്ക് വിറ്റത്. ഈ കാറിന്റെ നമ്പര് ആണ് അക്രമി സഞ്ചരിച്ച കാറില് പതിച്ചിരുന്നത്. സിസിടിവി ദൃശ്യങ്ങളുടെയും വീട്ടുകാരുടെ മൊഴിയുടെയും അടിസ്ഥാനത്തിലാണ് പ്രതിക്കായുള്ള അന്വേഷണം പൊലീസ് ഊര്ജിതമാക്കിയിരിക്കുന്നത്.
ഇന്നലെ രാവിലെ എട്ടരയോടെയാണ് ചെമ്പകശ്ശേരി സ്വദേശി ഷിനിക്ക് നേരെ വീട്ടില് വെച്ച് ആക്രമണം ഉണ്ടായത്. ആമസോണില് നിന്നുള്ള കൊറിയര് നല്കാനെന്ന പേരിലാണ് മുഖംമൂടി ധരിച്ച് അക്രമി എത്തിയത്. ഷിനിയുടെ പിതാവ് പാഴ്സല് വാങ്ങാന് ശ്രമിച്ചെങ്കിലും അക്രമി പാര്സല് നല്കിയില്ല. രജിസ്ട്രേഡ് കൊറിയര് ആണെന്നും ഷിനി തന്നെ ഒപ്പിട്ട് വാങ്ങണമെന്നുമായിരുന്നു വന്നയാളുടെ ആവശ്യം. പേനയെടുക്കാന് അച്ഛന് വീട്ടിനകത്ത് കയറിയതിനിടെ പുറത്തേക്ക് വന്ന ഷിനിയുടെ പേര് ചോദിച്ച് ഉറപ്പാക്കിയാണ് വെടിയുതിര്ത്തത്. ഒരെണ്ണം കയ്യില് കൊണ്ടു ബാക്കി രണ്ടെണ്ണം തറയിലുമാണ് പതിച്ചു. പിന്നീട് ഇവര് ഇവിടെ നിന്ന് രക്ഷപ്പെടുകയും ചെയ്തു.
കൈവെള്ളക്ക് പരിക്കേറ്റ ഷിനി സ്വകാര്യ ആശുപത്രിയില് ചികിത്സയിലാണ്. നാഷണല് ഹെല്ത്ത് മിഷന് പിആര്ഒ ആണ് ഷിനി. ആരാണ് വന്നതെന്നോ എന്തുദ്ദേശത്തിലായിരുന്നു അതിക്രമമെന്നോ അറിയില്ലെന്നാണ് കുടുംബം ആവര്ത്തിക്കുന്നത്. സിറ്റി പൊലീസ് കമ്മീഷണര് അടക്കം സ്ഥലത്തെത്തി സാഹചര്യം വിലയിരുത്തി. വിശദമായ മൊഴിയെടുത്ത് അന്വേഷണം നടത്തും.
