വെടിയേറ്റ ഷിനിയുടെ ഭര്ത്താവ് സുജിത്തിനെതിരെ ബലാത്സംഗത്തിന് കേസ്
തിരുവനന്തപുരം പടിഞ്ഞാറേക്കോട്ടയില് വീടുകയറി സുഹൃത്തിന്റെ ഭാര്യയെ ആക്രമിച്ചത് പീഡിപ്പിച്ചതിലുള്ള പ്രതികാരമെന്ന് വനിത ഡോക്ടര്. ഇതോടെ വെടിയേറ്റ ഷിനിയുടെ ഭര്ത്താവ് സുജിത്തിനെതിരെ ബലാത്സംഗത്തിന് കേസെടുത്തിരിക്കുകയാണ് പൊലീസ്. കേസിലെ പ്രതിയായ ഡോക്ടര് ദീപ്തി നല്കിയ മൊഴിയുടെ അടിസ്ഥാനത്തിലാണ് കേസെടുത്തിരിക്കുന്നത്. തന്നെ പീഡിപ്പിച്ചതിലുള്ള പ്രതികാരമായാണ് സുജിത്തിന്റെ വീട്ടില് കയറി ഭാര്യയെ ആക്രമിച്ചതെന്നായിരുന്നു ദീപ്തിയുടെ മൊഴി.
അറസ്റ്റിലായ ദീപ്തിയും ഷിനിയുടെ ഭര്ത്താവ് സുജിത്തും ഒന്നരവര്ഷം മുന്പ് കൊല്ലത്തെ സ്വകാര്യ മെഡിക്കല് കോളേജ് ആശുപത്രിയില് ഒന്നിച്ച് ജോലി ചെയ്തിരുന്നു. കൊവിഡ് കാലത്താണ് ഇരുവരും പരിചയത്തിലാകുന്നത്. അവിടെവച്ച് ഇവര് അടുപ്പത്തിലായിരുന്നു. എന്നാല് പിന്നീട സുജിത്ത് ഈ ബന്ധത്തില് നിന്നും പിന്മാറുകയായിരുന്നു. ഇരുവരും അടുപ്പത്തിലായിരുന്നു കാലത്ത് സുജിത്ത് തന്നെ പീഡിപ്പിച്ചിരുന്നുവെന്ന് ദീപ്തി മൊഴി നല്കിയിട്ടുണ്ട്. ഇതിലുള്ള പ്രതികാരമാണ് കൃത്യം നടത്താന് തന്നെ പ്രേരിപ്പിച്ചതെന്നും ദീപ്തി മൊഴി നല്കിയിട്ടുണ്ട്.
ചൊവ്വാഴ്ച ഉച്ചയോടെയാണ് പ്രതി ദീപ്തിയെ വഞ്ചിയൂര് പോലീസ് കസ്റ്റഡിയില് എടുത്തത്. ക്രിട്ടിക്കല് കെയര്വിഭാഗത്തിലെ പ്രധാന ഡോക്ടറായ ദീപ്തിയെ ഡ്യൂട്ടിക്കിടെ ഉച്ചയ്ക്ക് ആശുപത്രി പരിസരത്ത് നിന്ന് പൊലീസ് കസ്റ്റഡിയിലെടുക്കുകയായിരുന്നു. സംഭവ ദിവസം തന്നെ ആളെക്കുറിച്ച് പോലീസിന് വ്യക്തമായ സൂചനകള് ലഭിച്ചിരുന്നു. കൊല്ലം വരെയുള്ള സിസിടിവി ദൃശ്യങ്ങള് ശേഖരിച്ചും കേന്ദ്രീകരിച്ചും നടത്തിയ അന്വേഷണത്തിലൊടുവിലാണ് ദീപ്തിയെ പൊലീസ് കസ്റ്റഡിയിലെടുത്തത്.
മാസങ്ങളോളം നടത്തിയ തയ്യാറെടുപ്പുകള്ക്ക് ശേഷമാണ് ഇക്കഴിഞ്ഞ ഞായറാഴ്ചയാണ് ദീപ്തി വഞ്ചിയൂരിലെ സുജിത്തിന്റെ വീട്ടിലെത്തി ഭാര്യ ഷിനിക്ക് നേരെ വെടിയുതിര്ത്തത്. ആക്രമത്തില് ഷിനിയുടെ വലുതു കൈക്ക് പരിക്കേറ്റിരുന്നു. ആമസോണില് നിന്നുള്ള കൊറിയര് നല്കാനെന്ന പേരില് മുഖമൂടി ധരിച്ചെത്തിയാണ് ദീപ്തി ആക്രമണം നടത്തിയത്.
വീട്ടിലെ കോളിങ് ബെല്ല് കേട്ട് ഷിനിയുടെ ഭര്ത്താവിന്റെ അച്ഛനാണ് ആദ്യം വാതില് തുറന്നത്. രജിസ്റ്റേര്ഡ് കൊറിയര് ഉണ്ടെന്നും ഷിനി തന്നെ ഒപ്പിട്ട് വാങ്ങണമെന്നും പിന്നീട് ദീപ്തി ആവശ്യപ്പെട്ടു. ഇതോടെ ഒപ്പിടുന്നതിന് പേനയെടുക്കാന് അച്ഛന് വീട്ടിനുള്ളിലേക്ക് കയറി. ഈ സമയം ഷിനി പുറത്തേക്ക് വരികയായിരുന്നു. ഷിനിയുടെ പേര് ചോദിച്ച് ഉറപ്പാക്കിയ ശേഷം ദീപ്തി വെടിയുതിര്ത്തു. ആദ്യത്തെ വെടി ഷിനിയുടെ കൈയ്യിലും ബാക്കി രണ്ടെണ്ണം തറയിലുമാണ് പതിച്ചത്. തുടര്ന്ന് ദീപ്തി അവിടെ നിന്നും കടന്നുകളയുകയായിരുന്നു.
ആക്രമണത്തിന് ഉപയോഗിച്ച എയര്പിസ്റ്റള് ദീപ്തി ഓണ്ലൈനായി വാങ്ങിയതാണ്. പിസ്റ്റള് ഉപയോഗിക്കാനും വെടിവയ്ക്കാനും ഇന്റര്നെറ്റില് നോക്കി മാസങ്ങളോളം പരിശീലനം നടത്തിയതായും അന്വേഷണസംഘം കണ്ടെത്തിയിരുന്നു. അതേസമയം ദീപ്തി വന്ന കാറിന്റെ നമ്പറും വ്യാജമായിരുന്നു. തെറ്റിദ്ധരിപ്പിക്കാനായി പുറകില് എല് ബോര്ഡും പതിപ്പിച്ചിരുന്നു. എന്നാല് ദീപ്തി ബന്ധുവിന്റെ വാഹനം താല്ക്കാലികമായി വാങ്ങി എറണാകുളത്തെത്തി വ്യാജ നമ്പര് പ്ലേറ്റ് തയ്യാറാക്കിയതായി അന്വേഷണസംഘം കണ്ടെത്തി. ദീപ്തിയുടെ ഭര്ത്താവിന്റെ അച്ഛന്റെ പേരിലുള്ള കാറിലായിരുന്നു ഇവര് വന്നത്. സില്വര് കളറിലുള്ള കാര് ആയൂരിലുള്ള ദീപ്തിയുടെ ഭര്ത്താവിന്റെ വീട്ടില് നിന്നും കണ്ടെത്തിയിട്ടുണ്ട്.
