വയനാട്ടില് മുഴക്കവും വലിയ പ്രകമ്പനവും; പരിശോധനയുമായി ദുരന്ത നിവാരണ അതോറിറ്റി, ആളുകളെ ഒഴിപ്പിക്കും
വയനാട്ടില് വെള്ളിയാഴ്ച പകല് വലിയ തോതില് മുഴക്കവും വലിയ പ്രകമ്പനവും അനുഭവപ്പെട്ടു. രാവിലെ പത്തുമനോയോടെയാണ് നാല്പഞ്ചായത്തുകളില് ഇത് അനുഭവപ്പെട്ടത്. എന്നാല് ഭൂമി കുലുക്കത്തിന്റെ സൂചനകളൊന്നും ലഭിച്ചിട്ടില്ലെന്നും ഇക്കാര്യങ്ങള് പരിശോധിച്ചുവരുകയാണെന്നും കേരള ദുരന്ത നിവാരണ അതോറിറ്റി അറിയിച്ചു. വിശദമായ പരിശോധന നടത്തിയാലെ കൂടുതല് വിവരങ്ങള് ലഭിക്കുകയുള്ളുവെന്നും നിലവില് പ്രാഥമികമായി നടത്തിയ പരിശോധനയില് ഭൂമികുലുങ്ങിയതായുള്ള സൂചനകളൊന്നും ലഭിച്ചിട്ടില്ലെന്നും അധികൃതര് അറിയിച്ചു. വലിയ രീതിയിലുള്ള കുലുക്കം എവിടെയും ഉണ്ടായിട്ടില്ലെന്ന് കേന്ദ്ര കാലാവസ്ഥ വകുപ്പും അറിയിച്ചു.
വയനാട്ടിലെ ചില മേഖലകളില് ഭൂമിക്കടയില് മുഴക്കവും കുലുക്കവും അനുഭപ്പെട്ടതായി നാട്ടുകാര് പറഞ്ഞു. ഭൂമിക്കടിയില് നിന്നും മുഴക്കവും പ്രകമ്പനവും അനുഭവപ്പെട്ടു. ഭൂമികുലുക്കമെന്ന് സംശയമുള്ളതിനാല് ജിയോളജി വകുപ്പ് ഉദ്യോഗസ്ഥര് സ്ഥലത്തെത്തിയിട്ടുണ്ട്. സ്ഥലത്ത് നിന്നും ആളുകളോട് ഒഴിഞ്ഞുപോകാന് അധികൃതര് നിര്ദേശം നല്കി. അതേസമയം കോഴിക്കോടും പ്രകമ്പനം ഉണ്ടായതായി റിപ്പോര്ട്ടുണ്ട്.
കുര്ച്യര്മല, പിണങ്ങോട്, മോറിക്യാപ്പ്, അമ്പുകുത്തിമല, എടക്കല് ഗുഹ പ്രദേശങ്ങളിലെ ആളുകളോടാണ് ഒഴിഞ്ഞുപോകാന് ആവശ്യപ്പെട്ടിരിക്കുന്നത്. വലിയ ശബ്ദവും മുഴക്കവും ഉണ്ടായെന്നാണ് നാട്ടുകാര് പറയുന്നത്. എടയ്ക്കലില് നിന്നും ഉഗ്രശബ്ദം കേട്ടതായി നാട്ടുകാര് പറഞ്ഞു. രാവിലെ 10.15 ഓടെയാണ് ശബ്ദവും പ്രകമ്പനവും അനുഭവപ്പെട്ടത്. റവന്യൂവകുപ്പ് ഉദ്യോഗസ്ഥര് പ്രദേശത്തേക്കെത്തിയിട്ടുണ്ട്. പ്രദേശത്തെ സ്കൂളുകള് നേരത്തെ വിടുകയും ചെയ്തിട്ടുണ്ട്. ക്യാമ്പുകള് തുറന്നിട്ടുണ്ട്. ആശങ്കയുള്ളവര്ക്കു അവിടേയ്ക്കു പോകാവുന്നതാണെന്നു അധികൃതര് അറിയിച്ചിട്ടുണ്ട്.
