ഹേമ കമ്മിറ്റി: പരാതിയുമായി വനിതകള് വന്നാല്, ഏത് ഉന്നതനും കുടുങ്ങും- മുഖ്യമന്ത്രി
തിരുവനന്തപുരം: ഹേമ കമ്മിറ്റി റിപ്പോര്ട്ട് പുറത്തുവരാതിരിക്കാന് സര്ക്കാര് ശ്രമിച്ചിട്ടില്ലെന്ന് മുഖ്യമന്ത്രി പിണറായി വിജയന്. ശുപാര്ശകള് അതീവ പ്രാധാന്യം നല്കി നടപ്പിലാക്കാനാണ് സര്ക്കാര് ശ്രമിച്ചത്. റിപ്പോര്ട്ടില് പലരുടേയും സ്വകാര്യതയെ ബാധിക്കുന്ന പരാമര്ശങ്ങളുണ്ട്. അതിനാല്, റിപ്പോര്ട്ട് പുറത്തുവിടാന് പാടില്ലെന്ന് ജസ്റ്റിസ് ഹേമ ആവശ്യപ്പെട്ടിരുന്നുവെന്നും മുഖ്യമന്ത്രി തിരുവനന്തപുരത്ത് നടത്തിയ വാര്ത്താ സമ്മേളനത്തില് പറഞ്ഞു.
ഹേമാ കമ്മിറ്റി റിപ്പോര്ട്ടില് ഒരു പൂഴ്ത്തലും ഉണ്ടായിട്ടില്ല. റിപ്പോര്ട്ടില് പലരുടേയും സ്വകാര്യതയെ ബാധിക്കുന്ന പരാമര്ശങ്ങളുണ്ട്. അതുകൊണ്ട് തന്നെ ഇത് പുറത്തുവിടാന് പാടില്ല എന്ന് ആവശ്യപ്പെട്ടുകൊണ്ട് ജസ്റ്റിസ് ഹേമ തന്നെ 2020 ഫെബ്രുവരി 19-ന് സര്ക്കാരിന് കത്ത് നല്കിയിരുന്നു. തങ്ങളുടെ കമ്മിറ്റി മുന്പാകെ സിനിമാ മേഖലയിലെ ചില വനിതകള് നടത്തിയത് തികച്ചു രഹസ്യാത്മകമായ വെളിപ്പെടുത്തലുകളാണ്. ആയതിനാല് യാതൊരു കാരണവശാലും താന് അടങ്ങുന്ന കമ്മിറ്റി തയ്യാറാക്കിയ റിപ്പോര്ട്ട് പുറത്തുവിടാന് പാടില്ലെന്ന് ജസ്റ്റിസ് ഹേമ കത്തില് ആവര്ത്തിച്ചു പറഞ്ഞിരുന്നു.
ജസ്റ്റിസ് ഹേമ കമ്മിറ്റിറിപ്പോര്ട്ടുമായി ബന്ധപ്പെട്ട് മൊഴി നല്കിയ ഏതെങ്കിലും വനിത പരാതി നല്കാന് തയ്യാറായി മുമ്പോട്ട് വന്നാല് സര്ക്കാരില് നിന്ന് ഉചിതമായ ഇടപെടല് ഉണ്ടാകും. എത്ര ഉന്നതനായാലും കുറ്റം ചെയ്തിട്ടുണ്ടെങ്കിലും നിയമത്തിന് മുമ്പില് എത്തിക്കും. അതില് ഒരു തരത്തിലുള്ള സംശവും ആര്ക്കും വേണ്ടെന്നും മുഖ്യമന്ത്രി കൂട്ടിച്ചേര്ത്തു.
