സംവിധായകന് രഞ്ജിത്തിനെതിരെ ലൈംഗികാതിക്രമ പരാതി നല്കിയ യുവാവിന്റെ മൊഴിയെടുത്ത് അന്വേഷണസംഘം. ഐശ്വര്യ ഡോങ്റെ ഉള്പ്പെട്ട പ്രത്യേക അന്വേഷണ സംഘം കോഴിക്കോട് കാരപ്പറമ്പില് എത്തിയാണ് യുവാവിന്റെ മൊഴി രേഖപ്പെടുത്തിയത്. ആരോപണങ്ങങ്ങളില് ഉറച്ചുനില്ക്കുന്നെന്നും കൈയിലുള്ള തെളിവുകള് അന്വേഷണ സംഘത്തിന് കൈമാറുമെന്നും യുവാവ് പിന്നീട് പ്രതികരിച്ചു.
അതേസമയം കേസ് പിന്വലിക്കാന് സമ്മര്ദവും ഭീഷണിയും ഉണ്ടെന്നും സ്വാധീനിക്കാന് പലരും ശ്രമിക്കുന്നുവെന്നും യുവാവ് നേരത്തെ ആരോപിച്ചിരുന്നു. തനിക്ക് നീതിയാണ് ആവശ്യമെന്നും കൂടുതല് കാര്യങ്ങള് വെളിപ്പെടുത്താന് ഉണ്ടെന്നും യുവാവ് പറഞ്ഞിരുന്നു. ഹോട്ടല് മുറിയില്വെച്ച് രഞ്ജിത്ത് പീഡിപ്പിച്ചെന്നാണ് യുവാവിന്റെ പരാതി.
2012ല് ബാവൂട്ടിയുടെ നാമത്തില് എന്ന ചിത്രത്തിന്റെ ലൊക്കേഷനില് നടന്മാരെ കാണാന് പോയപ്പോഴാണ് രഞ്ജിത്തിനെ പരിചയപ്പെട്ടത്. അന്ന് പ്ലസ് ടു വിദ്യാര്ഥിയായിരുന്നു. ബെംഗളൂരുവിലെ പഞ്ചനക്ഷത്ര ഹോട്ടലില് വരാനാവശ്യപ്പെടുകയും അവിടെവെച്ച് സിനിമയില് അവസരം വാഗ്ദാനം ചെയ്ത് ക്രൂരമായി പീഡിപ്പിച്ചെന്നുമാണ് രഞ്ജിത്തിനെതിരെയുള്ള പരാതിയില് യുവാവ് വെളിപ്പെടുത്തിയത്.
അന്നുതന്നെ ഇക്കാര്യം ഒരു പ്രമുഖ നടിയെ അറിയിച്ചിരുന്നുവെന്നും എന്നാല് പ്രതികരിച്ചില്ലെന്നും കോഴിക്കോട് കസബ സ്റ്റേഷനില് യുവാവ് നല്കിയ പരാതിയില് പറയുന്നു.
രഞ്ജിത്തിനെതിരെ ലൈംഗികാരോപണ പരാതിയുമായി രംഗത്തുവന്ന യുവാവ് ഡബ്ലിയു സി സി അംഗമായ നടി രേവതിക്കെതിരെയും ആരോപണം ഉന്നയിച്ചു. തന്നെ വിവസ്ത്രനാക്കിയ ശേഷം തന്റെ നഗ്നചിത്രങ്ങന് രഞ്ജിത്ത് എടുത്തുവെന്നും, ഇത് കാമുകിക്ക് അയച്ചുകൊടുക്കുമെന്നും രഞ്ജിത്ത് പറഞ്ഞിരുന്നുവെന്ന് യുവാവ് മാധ്യമങ്ങളോട് പറഞ്ഞിരുന്നു. താന് റൂമില് എത്തിയപ്പോള് രഞ്ജിത്ത് ഒരു നടിയുമായി സംസാരിച്ചു കൊണ്ടിരിക്കുകയായിരുന്നു എന്നും തന്റെ നഗ്ന ഫോട്ടോ എടുത്തിട്ട് ആര്ക്കാണ് അയക്കുന്നത് എന്ന് ചോദിച്ചപ്പോള് 'നടി രേവതിക്കാണ്, രേവതിക്ക് നിന്നെ ഇഷ്ടമായി' എന്ന് പറഞ്ഞെന്നും യുവാവ് മാധ്യമങ്ങളോട് വെളിപ്പെടുത്തി.
'സംവിധായകന് രഞ്ജിത്ത് അദ്ദേഹത്തിന്റെ റൂമില് ചെന്ന എന്നോട് നഗ്നനായി നില്ക്കാന് പറഞ്ഞ സമയത്ത് അദ്ദേഹം ഒരു നടിയുമായി സംസാരിച്ചുകൊണ്ട് നില്ക്കുകയായിരുന്നു. ആ നടിയുടെ പേര് ഞാന് വെളിപ്പെടുത്തിയിട്ടുണ്ട്, അത് രേവതി ആണ്. നടി രേവതി ആണ് അത് എന്നാണ് രഞ്ജിത്ത് എന്നോട് പറഞ്ഞത്. രേവതിയും രഞ്ജിത്തും തമ്മില് ബന്ധമുണ്ടോ ഇല്ലയോ എന്നൊന്നും എനിക്ക് അറിയില്ല. രഞ്ജിത്ത് എന്റെ ഫോട്ടോ എടുത്തിട്ട് അവര്ക്ക് അയച്ചുകൊടുത്തു.' യുവാവ് പറയുന്നു.
ലൈംഗികാതിക്രമം നടത്തിയെന്നാരോപിച്ച് രഞ്ജിത്തിനെതിരെ നേരത്തെ ബംഗാളി നടി പരാതി നല്കിയിരുന്നു. ഇതേത്തുടര്ന്ന് ചലച്ചിത്ര അക്കാദമി ചെയര്മാന് സ്ഥാനത്തുനിന്ന് രഞ്ജിത്തിന് പടിയിറങ്ങേണ്ടിവന്നു.
