'ജീവന് ഭീഷണി'; തോക്ക് ലൈസന്സിനായി അപേക്ഷ നല്കി പിവി അന്വര് എംഎല്എ
എഡിജിപിക്കും മുഖ്യമന്ത്രിയുടെ ഓഫീസിനും എതിരെ ഗുരുതര ആരോപണം ഉന്നയിച്ച ഇടതു എംഎല്എ പിവി അന്വര് തോക്ക് ലൈസന്സിനായി അപേക്ഷ നല്കി. തന്റെ ജീവന് ഭീഷണി ഉണ്ടെന്ന് കാണിച്ച് മലപ്പുറം കളക്ട്രേറ്റിലെത്തിയാണ് പിവി അന്വര് അപേക്ഷ നല്കിയത്. നാളെ മുഖ്യമന്ത്രിയെ കാണാന് ശ്രമിക്കുമെന്നും വെളിപ്പെടുത്തലുകള് തല്ക്കാലം നിര്ത്തുന്നുവെന്നും അന്വര് മാധ്യമങ്ങളോട് പറഞ്ഞു.
കല്ലുകൊണ്ടെറിഞ്ഞ് വീഴ്ത്തുന്ന ഭീഷണിയാണെങ്കില് അങ്ങനെയെന്നും ജീവനു ഭീഷണിയുള്ളത് കൊണ്ടാണ് തോക്കിന് അപേക്ഷിച്ചതെന്നും അന്വര് മാധ്യമ പ്രവര്ത്തകരോട് പ്രതികരിച്ചു. പൊലീസ് സുരക്ഷയുണ്ടായിട്ടും തോക്കിന് അപേക്ഷിച്ചത് എന്തിനാണെന്ന ചോദ്യത്തിന് അത് ഞാന് മാനേജ് ചെയ്തോളാമെന്നായിരുന്നു മാധ്യമങ്ങളോടുള്ള പ്രതികരണം.
എഡിജിപിക്കെതിരെ ഇന്നും ഗുരുതരമായ ആരോപണങ്ങളാണ് അന്വര് ഉയര്ത്തിയത്. സോളാര് കേസ് അട്ടിമറിച്ചതിനെക്കുറിച്ച് ഒരു പൊലീസ് ഉദ്യോഗസ്ഥന്റെ വെളിപ്പെടുത്തല് ഓഡിയോയാണ് എംഎല്എ പുറത്തുവിട്ടത്. കേസ് അട്ടിമറിച്ചതില് പ്രധാന ഉത്തരവാദി എംആര് അജിത്ത് കുമാറാണെന്ന് എംഎല്എ ആരോപിക്കുന്നത്. എംആര് അജിത്ത് കുമാര് തിരുവനന്തപുരത്ത് കവടിയാറില് വലിയൊരു കൊട്ടാരം പണിയുന്നുണ്ട്. കവടിയാറില് 12000/15000 ചതുരശ്ര അടി വിസ്തീര്ണമുള്ള വീടാണ് അജിത് കുമാര് പണിയുന്നത്. 15 കോടിക്കാണ് അജിത് കുമാര് കവടിയാറില് വീട് വെക്കാന് സ്ഥലം വാങ്ങിയതെന്നും പിവി അന്വര് ആരോപിച്ചു.
എടവണ്ണക്കേസില് നിരപരാധിയെ എം ആര് അജിത്ത് കുമാര് കുടുക്കിയെന്നും അന്വര് ആരോപിക്കുന്നു. എടവണ്ണ യുവാവ് വെടിയേറ്റ് മരിച്ച കേസില് പ്രതിയായ ഷാന് ഒരിക്കലും ഭര്ത്താവിനെ കൊല്ലില്ലെന്നാണ് എന്നാണ് മരിച്ച റിദാന്റെ ഭാര്യ തന്നോട് പറഞ്ഞത്. കേസില് കള്ളമൊഴി നല്കാന് ഭാര്യക്കുമേല് പൊലീസ് വലിയതോതില് സമ്മര്ദം ചെലുത്തി. ക്രൂരമായി മര്ദ്ദിച്ചു. അവര് വഴങ്ങിയില്ല. മരിച്ച റിദാന്റെ രണ്ട് ഫോണും കണ്ടെത്താനായിട്ടില്ലെന്നും അന്വര് പറയുന്നു.
അജിത്ത് കുമാറിന്റെ സംഘം വിമാനത്താവളത്തില് നിന്നും കോടികളുടെ സ്വര്ണം കടത്തിയിട്ടുണ്ട്. മുജീബ് എന്നയാളാണ് എം.ആര് അജിത്ത് കുമാറിന്റെ പ്രധാന സഹായി. മുഖ്യമന്ത്രിയുടെ ഓഫീസിലെ ഫോണും സംഘം ചോര്ത്തുന്നുണ്ട്. പുറത്ത് വിടാത്ത തെളിവുകര് ഇനിയും കയ്യിലുണ്ട്. അജിത്ത് കുമാറിനെതിരെ അന്വേഷണം നടത്തുന്ന അന്വേഷണ സംഘത്തിനോട് സഹകരിക്കുമെന്നും എല്ലാ തെളിവുകളും കൊടുക്കുമെന്നും എംഎല്എ വ്യക്തമാക്കി. അജിത്ത് കുമാര് മാറി നിന്നാലും രാജിവെച്ചാലും ആരോപണങ്ങള് നിലനില്ക്കുമെന്ന് പി വി അന്വര് കൂട്ടിച്ചേര്ത്തു.
