എല്ലാ എക്സിറ്റ് പോളുകളെയും നിലംപരിശാക്കി ഹരിയാന നിയമസഭ തെരഞ്ഞെടുപ്പില് ബിജെപിയുടെ അപ്രതീക്ഷിത കുതിപ്പ്. വോട്ടെടുപ്പിലെ വന് ട്വിസ്റ്റില് അമ്പരന്നിരിക്കുകയാണ് കോണ്ഗ്രസ്. ആദ്യ ലാപ്പില് കേവല ഭൂരിപക്ഷത്തിനടുത്തേക്ക് മുന്നേറിയ കോണ്ഗ്രസിനെ രണ്ടാം ലാപ്പില് പിന്നിലാക്കി ബിജെപി മുന്നിലെത്തിയതോടെ ദില്ലിയിലെ എഐസിസി ആസ്ഥാനത്തെ കോണ്ഗ്രസ് ആഘോഷങ്ങള് നിര്ത്തിവെച്ചു. ഹരിയാനയിലെ ആഘോഷങ്ങളും കോണ്ഗ്രസ് നിര്ത്തി.
ഏറ്റവും പുതിയ കണക്കുകള് പ്രകാരം ഹരിയാനയില് ബിജെപി 49 സീറ്റില് മുന്നേറുകയാണ്. കോണ്ഗ്രസ് 35 ഇടത്തും മുന്നിലാണ്. ലീഡ് നിലയില് പിന്നോട്ട് പോയതോടെ കോണ്ഗ്രസ് ക്യാമ്പിലും ആശങ്ക പടര്ന്നു.
രാവിലെ വോട്ടെണ്ണല് ആരംഭിച്ചത് മുതല് ഹരിയാനയില് കോണ്ഗ്രസ് മുന്നേറ്റമായിരുന്നു ഉണ്ടായിരുന്നത്. പിന്നീട് വോട്ടെണ്ണല് പുരോഗമിച്ചതോടെ ലീഡ് നില മാറി മറഞ്ഞു. ബിജെപിയുടെ മുന്നേറ്റം കോണ്ഗ്രസ് ക്യാമ്പില് നിരാശയുണ്ടാക്കി. വിജയ പ്രതീക്ഷയില് ദില്ലിയിലെ എഐസിസി ആസ്ഥാനത്ത് ലഡ്ഡു ഉള്പ്പെടെ വിതരണം ചെയ്ത് കോണ്ഗ്രസ് ആഘോഷം ആരംഭിച്ചിരുന്നു.
എന്നാല്, ലീഡ് നില പെട്ടെന്ന് മാറിയതോടെ ആഘോഷങ്ങളെല്ലാം നിര്ത്തിവെച്ചു. ഹരിയാനയിലെ മുന് മുഖ്യമന്ത്രി ഭൂപീന്ദര് സിംഗ് ഹൂഡയുടെ വീട്ടിലെ ആഘോഷങ്ങളും നിര്ത്തിവെച്ചു. പുറത്തുവന്ന എഴ് എക്സിറ്റ്പോളുകളും 55 സീറ്റോളമായിരുന്നു ഹരിയാനയില് കോണ്ഗ്രസിന് പ്രവചിച്ചിരുന്നത്.
