പനി ബാധിച്ച് മരിച്ച പ്ലസ് ടു വിദ്യാര്ത്ഥിനി ഗര്ഭിണി: സഹപാഠി അറസ്റ്റില്
പത്തനംതിട്ട: പനി ബാധിച്ച് മരിച്ച പ്ലസ് ടു വിദ്യാര്ത്ഥിനി ഗര്ഭിണിയായിരുന്നെന്ന് കണ്ടെത്തിയ സംഭവത്തില് സഹപാഠിയായ പ്ലസ് ടു വിദ്യാര്ത്ഥി അറസ്റ്റില്. തുടര്ച്ചയായ ചോദ്യം ചെയ്യലില് കുറ്റസമ്മതം നടത്തിയതോടെയാണ് പൊലീസ് വിദ്യാര്ത്ഥിയെ അറസ്റ്റ് ചെയ്തത്. പോക്സസോ കേസടക്കം പ്രതിക്കെതിരെ ചുമത്തിയിട്ടുണ്ട്.
പെണ്കുട്ടിയുമായി അടുപ്പത്തിലായിരുന്നുവെന്ന് ഇയാള് സമ്മതിച്ചിട്ടുണ്ട്. 18 വയസും ആറ് മാസവുമാണ് ആലപ്പുഴ നൂറനാട് സ്വദേശിയായ പ്രതിയുടെ പ്രായം.
മരിച്ച 17കാരി പത്തനംതിട്ടയിലെ പ്രമുഖ വിദ്യാഭ്യാസ സ്ഥാപനത്തിലെ പ്ലസ്ടു വിദ്യാര്ത്ഥിനിയാണ്. പനി ബാധിച്ച പെണ്കുട്ടി ഒരാഴ്ചയോളം പത്തനംതിട്ടയിലെ വിവിധ ആശുപത്രികളില് ചികിത്സയിലായിരുന്നു. നവംബര് 22ാം തീയതിയാണ് പെണ്കുട്ടിയെ വിദഗ്ദ്ധ ചികിത്സയ്ക്കായി ആലപ്പുഴ മെഡിക്കല് കോളേജ് ആശുപത്രിയിലേക്ക് മാറ്റിയത്. ഇവിടെ ചികിത്സയിലിരിക്കെ തിങ്കളാഴ്ച പുലര്ച്ചെയോടെ മരണം സംഭവിക്കുകയായിരുന്നു. പെണ്കുട്ടിയുടെ മരണത്തില് അസ്വാഭാവികത തോന്നിയതിനാലാണ് പോസ്റ്റ്മോര്ട്ടം നടത്താന് തീരുമാനിച്ചത്. പോസ്റ്റ്മോര്ട്ടത്തിലാണ് പെണ്കുട്ടി അഞ്ചുമാസം ഗര്ഭിണിയാണെന്ന് കണ്ടെത്തിയത്.
പെണ്കുട്ടി അമിതമായ അളവില് മരുന്ന് കഴിച്ചത് അണുബാധയിലേക്ക് നയിക്കുകയും തുടര്ന്ന് മരണം സംഭവിക്കുകയുമായിരുന്നെന്നാണ് നിലവിലെ നിഗമനം. പെണ്കുട്ടി ഗര്ഭിണിയായിരുന്നെന്ന് ബന്ധുക്കള്ക്കും അറിവുണ്ടായിരുന്നില്ല എന്നാണ് വിവരം.
