ഭാര്യയുടെ കാര് തടഞ്ഞു പെട്രോളൊഴിച്ചു കൊന്നു; സ്റ്റേഷനില് കീഴടങ്ങി ഭര്ത്താവ്
കൊല്ലം: കാറില് സഞ്ചരിക്കുകയായിരുന്ന ഭാര്യയെ നടുറോഡില് വാന് കുറുകെയിട്ടു തടഞ്ഞ ശേഷം പെട്രോള് ഒഴിച്ചു തീ കൊളുത്തി കൊലപ്പെടുത്തി. ഭാര്യയ്ക്ക് ഒപ്പമുണ്ടായ യുവാവിന് പൊള്ളലേറ്റു. സംഭവത്തില് ഭര്ത്താവ് സ്റ്റേഷനില് എത്തി കീഴടങ്ങി. ഇന്നലെ രാത്രി പത്തോടെ ഉണ്ടായ സംഭവത്തില് കൊട്ടിയം തഴുത്തല സ്വദേശി അനില മരിച്ചു. സംഭവത്തില് അനിലയുടെ ഭര്ത്താവ് പത്മരാജനെ ഈസ്റ്റ് പോലീസ് കസ്റ്റഡിയില് എടുത്തു. പൊള്ളലേറ്റ സോണി എന്ന യുവാവിനെ ആശുപത്രിയില് പ്രവേശിപ്പിച്ചു. പ്രതിയെ പോലീസ് ചോദ്യം ചെയ്ത് വരികയാണ്.
ഒമ്നി വാനിലെത്തിയ പത്മരാജന് അനിലയും സോണിയും സഞ്ചരിച്ച കാറിനെ വഴിയില് തടഞ്ഞ് വാഹനത്തിലേക്ക് ബക്കറ്റില് പെട്രോളൊഴിച്ച് തീകൊളുത്തുകയായിരുന്നു. കൊല്ലം നഗരത്തിലെ ബേക്കറിയുടെ ഉടമയാണ് അനില.
ഇവരെയും സ്ഥാപനത്തിലെ പങ്കാളിയായ യുവാവിനെയും ലക്ഷ്യമിട്ടായിരുന്നു ആക്രമണം എന്നാണ് പോലീസിന് ലഭിച്ചിരിക്കുന്ന വിവരം. എന്നാല് പത്മരാജന് ലക്ഷ്യമിട്ടയാളല്ല കാറില് ഉണ്ടായിരുന്നതെന്ന് പോലീസ് പറഞ്ഞു. പോലീസുകാര്ക്കു മുന്നില് എല്ലാം താനാണ് ചെയ്തതെന്ന് അയാള് പറഞ്ഞു. ഇരുവരും തമ്മിലുണ്ടായ തര്ക്കവും കച്ചവടത്തിലെ പങ്കാളിയുമായുള്ള അടുപ്പം സംബന്ധിച്ച വഴക്കുമെല്ലാം അക്കമിട്ടു നിരത്തി. ഭാര്യയുടെ ബേക്കറിയില് പങ്കാളിയായ യുവാവ് തന്നെ മര്ദിച്ചു പരിക്കേല്പ്പിച്ച കാല് കാട്ടിക്കൊടുത്തു.
ചെമ്മാന്മുക്ക് ജംക്ഷനില് കാര് എത്തിയപ്പോള് വാന് കാറിന്റെ മുന്വശത്ത് ഇടിച്ചു നിര്ത്തിയ ശേഷം വാനില് ഇരുന്നുകൊണ്ടു തന്നെ ബക്കറ്റില് കരുതിയിരുന്ന പെട്രോള് കാറിലേക്ക് ഒഴിച്ചു തീ കൊളുത്തുകയായിരുന്നു. ഇറങ്ങി രക്ഷപ്പെടാന് കഴിയാത്ത വിധം കാറില് കുടുങ്ങിയ അനില പൊള്ളലേറ്റു തല്ക്ഷണം മരിച്ചു. പൊള്ളലുകളോടെ കാറില്നിന്ന് ഇറങ്ങിയോടിയ സോണിയെ പിന്നീട് ആശുപത്രിയിലേക്കു മാറ്റി. തീ കൊളുത്തുന്നതിനിടെ പൊള്ളലേറ്റ പത്മരാജന് ഓട്ടോറിക്ഷയില് കയറി സ്റ്റേഷനിലെത്തി കീഴടങ്ങുകയായിരുന്നു. രണ്ട് വാഹനങ്ങളും പൂര്ണമായും കത്തിനശിച്ചു.
കൊട്ടിയത്തെ പെട്രോള് പമ്പിലെത്തി മൂന്നുലിറ്റര് പെട്രോള് കന്നാസില് വാങ്ങി. തഴുത്തലയിലെ വീട്ടിലെത്തിയ പത്മരാജന് സ്റ്റീല് ബക്കറ്റിലേക്ക് ഒഴിച്ചു. തുടര്ന്ന് പെട്രോള് നിറച്ച ബക്കറ്റ് വാനിലാക്കിയശേഷം അനില കാറില് വരുന്നതും നോക്കി ചെമ്മാന്മുക്കിനു സമീപം കാത്തുകിടന്നു. കൈയില് കരുതിയിരുന്ന ലൈറ്റര് ഉപയോഗിച്ചാണ് തീകൊളുത്തിയത്.
അനിലയുടെ ബേക്കറിയില് പങ്കാളിത്തമുള്ള കടപ്പാക്കട കുന്നേല്മുക്ക് സ്വദേശിയായ യുവാവ് പിന്നാലെ ബൈക്കിലെത്തിയിരുന്നെന്നും പോലീസ് സംശയിക്കുന്നു. ഇയാളെയും വിശദമായി ചോദ്യംചെയ്തുവരികയാണ്.
