'കുറച്ച് സിനിമയും കാശുമായപ്പോള് അഹങ്കാരം'; നൃത്തം പഠിപ്പിക്കാന് നടി ചോദിച്ചത് 5 ലക്ഷമെന്ന് മന്ത്രി ശിവന്കുട്ടി
പ്രശസ്ത മലയാള സിനിമ നടിക്കെതിരെ വിമര്ശനവുമായി വിദ്യാഭ്യാസ മന്ത്രി വി. ശിവന്കുട്ടി. സംസ്ഥാന സ്കൂള് കലോത്സവത്തിന്റെ അവതരണഗാനത്തിന് കുട്ടികളെ നൃത്തം പഠിപ്പിക്കാന് നടി ലക്ഷങ്ങള് പ്രതിഫലം വേണമെന്ന് ആവശ്യപ്പെട്ടെന്ന് മന്ത്രി ആരോപിച്ചു. സ്കൂള് കലോത്സവം വഴി മികച്ച കലാകാരിയായി ഉന്നതിയിലെത്തുമ്പോള് കേരളത്തോട് ഇവര് അഹങ്കാരം കാണിക്കുകയാണെന്നും മന്ത്രി വിമര്ശിച്ചു.
16,000 കുട്ടികളെ പങ്കെടുപ്പിച്ച് ജനുവരിയില് നടത്തുന്ന സംസ്ഥാന സ്കൂള് കലോത്സവത്തിന്റെ അവതരണ ഗാനത്തിന് വേണ്ടിയാണ് നൃത്തം പഠിപ്പിക്കാന് നടിയോട് ആവശ്യപ്പെട്ടതെന്ന് മന്ത്രി പറഞ്ഞു. യുവജനോത്സവം വഴി വളര്ന്നുവന്ന ഒരു പ്രശസ്ത സിനിമാ നടിയോടാണ് പത്ത് മിനിട്ട് ദൈര്ഘ്യമുള്ള നൃത്തം കുട്ടികളെ പഠിപ്പിക്കാമോ എന്ന് ചോദിച്ചത്. അവര് സമ്മതിക്കുകയും ചെയ്തിരുന്നു. എന്നാല് അഞ്ച് ലക്ഷം രൂപയാണ് അവര് പ്രതിഫലം ചോദിച്ചതെന്നും മന്ത്രി പറഞ്ഞു.
വിദ്യാഭ്യാസ മന്ത്രിയെന്ന നിലയില് തന്നെ ഏറെ വേദനിപ്പിച്ച സംഭവമാണിതെന്നും മന്ത്രി കൂട്ടിച്ചേര്ത്തു. എന്നാല് നടി ആരാണെന്ന് മന്ത്രി വെളിപ്പെടുത്തിയില്ല. തുടര്ന്ന് ഇത്രവലിയ തുകനല്കി കുട്ടികളെ സ്വാഗതഗാനം പഠിപ്പിക്കേണ്ടെന്ന് തീരുമാനിക്കുകയായിരുന്നെന്ന് മന്ത്രി പറഞ്ഞു. സാമ്പത്തിക മോഹികളല്ലാത്ത എത്രയോ നൃത്ത അദ്ധ്യാപകരുണ്ട്. അവരെ ഉപയോഗിച്ച് സ്വാഗതഗാനം പഠിപ്പിക്കാന് തീരുമാനിച്ചുവെന്നും മന്ത്രി പറഞ്ഞു.
അതേസമയം സ്കൂള് കലോത്സവം വഴി മികച്ച കലാകാരി ആകുകയും അതുവഴി സിനിമയിലെത്തി അവിടെ വലിയ നിലയിലാകുകയും ചെയ്ത ചില നടിമാര് കേരളത്തോട് അഹങ്കാരമാണ് കാണിക്കുന്നതെന്നും മന്ത്രി കുറ്റപ്പെടുത്തി. ഇത്തരക്കാര് പിന്തലമുറയ്ക്ക് മാതൃകയാകേണ്ടവരാണ്. കുറച്ച് സിനിമയും കുറച്ച് കാശും ആയപ്പോള് കേരളത്തോട് ഇവര് അഹങ്കാരം കാണിക്കുകയാണെന്നും മന്ത്രി പറഞ്ഞു. കേരളത്തിലെ 47 ലക്ഷം വിദ്യാര്ത്ഥികളോടാണ് നടി അഹങ്കാരം കാണിച്ചതെന്നും മന്ത്രി കുറ്റപ്പെടുത്തി.
