അധ്യാപകന്റെ കൈവെട്ടിയ കേസില് മുഖ്യസൂത്രധാരന്റെ ശിക്ഷ മരവിപ്പിച്ച് ജാമ്യം അനുവദിച്ച് ഹൈക്കോടതി
പ്രൊഫ. ടിജെ ജോസഫിന്റെ കൈവെട്ടിയ കേസില് മുഖ്യസൂത്രധാരന്റെ ശിക്ഷ മരവിപ്പിച്ച് ജാമ്യം അനുവദിച്ചു. കേസിലെ മുഖ്യസൂത്രധാരനായ എംകെ നാസറിനാണ് ഹൈക്കോടതി ജാമ്യം നല്കിയത്. 9 വര്ഷമായി ജയിലില് കഴിയുന്നു എന്ന വാദം അംഗീകരിച്ചാണ് നടപടി. വിചാരണ കോടതി ഉത്തരവ് ചോദ്യം ചെയ്തുള്ള അപ്പീലിലാണ് ശിക്ഷ മരവിപ്പിച്ച് ജാമ്യം അനുവദിച്ചത്.
ടിജെ ജോസഫിന്റെ കൈവെട്ടിയ സംഭവത്തിന്റെ മുഖ്യസൂത്രധാരന് എന്ന പേരിലാണ് എംകെ നാസര് അറിയപ്പെട്ടിരുന്നത്. പോപ്പുലര് ഫ്രണ്ടിന്റെ മുന് ജില്ലാ ഭാരവാഹി ആയിരുന്നു. സംഭവത്തിന് പിന്നാലെ ഒളിവില് പോയ നാസറിനെ ഏറെക്കാലത്തെ തെരച്ചതിന് ശേഷമാണ് പിടികൂടിയത്.
2010 ജൂലൈ 4 നാണ് ചോദ്യപ്പേപ്പറില് മതനിന്ദ ആരോപിച്ച് തൊടുപുഴ ന്യൂമാന് കോളേജില് അധ്യാപകനായിരുന്ന പ്രൊഫ. ടിജെ ജോസഫിന്റെ കൈപ്പത്തി സവാദിന്റെ നേതൃത്വത്തിലുള്ള സംഘം വെട്ടിയത്. ആക്രമണത്തിന് നിയോഗിച്ച സംഘത്തെ നിയന്ത്രിച്ചിരുന്നത് നാസറാണ്. പ്രതികള് ഉപയോഗിച്ചിരുന്ന മൊബൈലുകളും സിമ്മുകളും ഒളിപ്പിച്ചത് ഇയാളാണെന്നും കോടതി കണ്ടെത്തിയിരുന്നു.
