ഒരു രാജ്യം ഒരു തിരഞ്ഞെടുപ്പ്; ബില് പാര്ലമെന്റില് അവതരിപ്പിച്ചു, എതിര്ത്ത് പ്രതിപക്ഷം
ഒരു രാജ്യം ഒരു തിരഞ്ഞെടുപ്പ് ബില്ല് പാര്ലമെന്റില് അവതരിപ്പിച്ചു. ബില്ല് വിശദ വിശകലനത്തിനായി ജോയിന്റ് കമ്മിറ്റിക്ക് കൈമാറും. അതേസമയം ബില്ലിനെതിരെ പ്രതിപക്ഷ പാര്ട്ടികള് വിമര്ശനം ഉന്നയിച്ചു. ബില്ല് ഭരണഘടനാ വിരുദ്ധമാണെന്ന് ആര്ജെഡിയുടെ പ്രതികരിച്ചു.
കേന്ദ്ര നിയമ മന്ത്രി അര്ജുന് റാം മേഘ്വാളാണ് എട്ട് പേജുകളുള്ള ബില്ല് അവതരിപ്പിച്ചത്. ശക്തമായ വിമര്ശനമാണ് ബില്ലിനെതിരെ പ്രതിപക്ഷ പാര്ട്ടികള് ഉന്നയിച്ചത്. ബില്ല് ഭരണഘടനാ വിരുദ്ധമാണ് എന്നായിരുന്നു ആര്ജെഡിയുടെ പ്രതികരണം. ഭരണഘടനയുടെ അടിസ്ഥാന ഘടനയ്ക്ക് വിരുദ്ധമാണ് ഒരു രാജ്യം ഒരു തിരഞ്ഞെടുപ്പ് നയമെന്ന് ചൂണ്ടിക്കാട്ടിയ കോണ്ഗ്രസ് ബില്ലിനെ പൂര്ണമായും എതിര്ക്കുന്നുവെന്നും വ്യക്തമാക്കി.
അതേസമയം ബില്ല് തിങ്കളാഴ്ച അവതരിപ്പിക്കുമെന്നായിരുന്നു നേരത്തെ അറിയിച്ചിരുന്നത്. എന്നാല് ഇത് പിന്നീട് മാറ്റുകയായിരുന്നു. 2 ബില്ലുകളാണ് അവതരിപ്പിച്ചത്. ലോകസഭ -നിയമസഭ തിരഞ്ഞെടുപ്പുകള് ഒരുമിച്ച് നടത്താനുള്ള 129 ആം ഭേദഗതി ബില്ല്, നിയമസഭകളുള്ള മൂന്ന് കേന്ദ്രഭരണ പ്രദേശങ്ങളില് ഒരേസമയം തിരഞ്ഞെടുപ്പുമായി ബന്ധപ്പെട്ട ബില്ല് എന്നിവയാണ് അവതരിപ്പിച്ചത്.
ബില്ല് ഭരണ ഘടന വിരുദ്ധമെന്നും, ഫെഡറല് വ്യവസ്ഥയെ തകര്ക്കുന്നത് എന്ന് മടക്കം ബില്ലിനെതിരെ പ്രതിപക്ഷ പാര്ട്ടികള് കടുത്ത എതിര്പ്പ് ഉന്നയിച്ചിരുന്നു. ബില്ല് സംയുക്ത പാര്ലമെന്ററി സമിതിക്ക് വിടാന് തയ്യാറെന്ന് ഭരണപക്ഷം അറിയിച്ചിട്ടുണ്ട്.
ബില് പാസാകാന് കടമ്പകള് ഏറെയാണ്. ഭരണഘടന ഭേദഗതി അംഗീകരിക്കാന് പാര്ലമെന്റിന്റെ ഇരുസഭകളിലും മൂന്നില് രണ്ട് ഭൂരിപക്ഷം ആവശ്യമാണ്. സംസ്ഥാനങ്ങളുടെ പിന്തുണയും ഉറപ്പാക്കേണ്ടതുണ്ട്. ഇപ്പോഴത്തെ സംഖ്യയില് എന്ഡിഎക്ക് ഒറ്റക്ക് ബില് പാസാക്കാനാവില്ല. പ്രതിപക്ഷ പാര്ട്ടികളുടെ കൂടി സഹകരണം ഇക്കാര്യത്തില് വേണ്ടി വരും.
ഭരണഘടനയുടെ 82, 83, 172, 327 എന്നീ അനുച്ഛേദങ്ങളിലാണ് ഭേദഗതി വരുത്തുന്നത്. ആകെ 17 ഭേദഗതികളാണ് നിശ്ചയിച്ചിരിക്കുന്നത്. ഏതെങ്കിലും നിയമസഭയില് തിരഞ്ഞെടുപ്പ് മാറ്റിവയ്ക്കാന് തിരഞ്ഞെടുപ്പ് കമ്മീഷന് അധികാരം ഉണ്ടാകും. കേന്ദ്രഭരണപ്രദേശങ്ങള്ക്കായി പ്രത്യേക ബില്ലും അവതരിപ്പിക്കും.
