സംസ്ഥാനത്ത് വീണ്ടും പൊലീസ് ആത്മഹത്യ; രാമമംഗലം സ്റ്റേഷനിലെ ഡ്രൈവര് തൂങ്ങി മരിച്ച നിലയില്
സംസ്ഥാനത്ത് വീണ്ടും പൊലീസ് ആത്മഹത്യ. രാമമംഗലം സ്റ്റേഷനിലെ ഡ്രൈവര് സി. ബിജുവിനെ തൂങ്ങി മരിച്ച നിലയില് കണ്ടെത്തി. വ്യക്തിപരമായ കാരണങ്ങളാണ് ആത്മഹത്യക്ക് കാരണമെന്നാണ് വിവരം. ഉച്ചയ്ക്ക് 12 മണിയോടെ അയല്വാസികളാണ് ബിജുവിനെ തൂങ്ങി മരിച്ച നിലയില് കണ്ടത്. മൃതദേഹം പിറവം താലൂക്ക് ആശുപത്രിയിലേക്ക് മാറ്റി.
അതേസമയം അരീക്കോട് സ്പെഷ്യല് ഓപ്പറേഷന് ഗ്രൂപ്പ് ക്യാമ്പില് കമാന്ഡോ ഹവില്ദാര് വിനീത് ഇക്കഴിഞ്ഞ ദിവസമാണ് ആത്മഹത്യ ചെയ്തത്. ആത്മഹത്യക്ക് പിന്നാലെ വിനീത് കടുത്ത മാനസിക സംഘര്ഷം നേരിട്ടിരുന്നുവെന്ന് സൂചിപ്പിക്കുന്ന കുറിപ്പ് പുറത്തുവന്നിരുന്നു. മരിക്കുന്നതിന് മുന്പ് വിനീത് താന് നേരിടുന്ന പ്രശ്നങ്ങളും മറ്റും സൂചിപ്പിച്ച് ബന്ധുവിനാണ് മെസേജ് അയച്ചിരുന്നത്.
വയനാട് കല്പ്പറ്റ ചെങ്ങഴിമ്മല് വീട്ടില് ഹവില്ദാര് വിനീതിനെ കഴിഞ്ഞ ദിവസം രാത്രി 8:50നാണ് മരിച്ച നിലയില് കണ്ടെത്തിയത്. സ്വയം വെടിയുതിര്ത്തതാണെന്നാണ് നിഗമനം. ക്യാമ്പിലെ ജോലി സമ്മര്ദ്ദമാണ് ആത്മഹത്യയിലേക്ക് നയിച്ചതെന്നാണ് സൂചന. ശാരീരിക ക്ഷമതാ പരിശോധനയില് പരാജയപ്പെട്ടതും, ഗര്ഭിണിയായ ഭാര്യയെ ശുശ്രൂഷിക്കാന് അവധി നല്കാത്തതുമെല്ലാം വിനീതിന്റെ മരണത്തിന് കാരണമെന്നാണ് നിഗമനം. അതേസമയം സംഭവത്തില് പൊലീസ് അന്വേഷണം ആരംഭിച്ചു.
