മുറിഞ്ഞകല്ലില് വാഹനാപകടത്തില് മരിച്ച നവദമ്പതികള് ഉള്പ്പെടെ നാല് പേര്ക്കും കണ്ണീരോടെ വിട
മുറിഞ്ഞകല്ലില് ഞായറാഴ്ച പുലര്ച്ചെ ഉണ്ടായ വാഹനാപകടത്തില് മരിച്ച നാല് പേരുടെ സംസ്കാരം നടന്നു. പൂങ്കാവ് സെന്റ് മേരീസ് കത്തോലിക്ക പള്ളിയില് ഉച്ചയ്ക്ക് പന്ത്രണ്ടരയോടെയായിരുന്നു സംസ്കാരം. രാവിലെ എട്ടു മണി മുതല് മൃതദേഹം പൊതുദര്ശനത്തിന് വച്ചിരുന്നു. നൂറുകണക്കിന് പേരാണ് അന്ത്യാഞ്ജലി അര്പ്പിക്കാനെത്തിയത്.
നവദമ്പതിമാരായ നിഖിലും അനുവും ഇരുവരുടെയും അച്ഛന്മാരായ ബിജു പി ജോര്ജ്, മത്തായി ഈപ്പന് എന്നിവരാണ് അപകടത്തില് മരിച്ചത്. നിഖിലിന്റെയും അനുവിന്റേയും മത്തായിയുടെയും മൃതദേഹങ്ങള് ഒരേ കല്ലറയിലാണ് അടക്കം ചെയ്തത്. മധുവിധു കഴിഞ്ഞ് മലേഷ്യയില് നിന്നു മടങ്ങിയെത്തിയ ദമ്പതിമാരെ വിമാനത്താവളത്തില് നിന്ന് കൂട്ടിക്കൊണ്ട് വരും വഴി ശബരിമല തീര്ത്ഥാടകരുടെ ബസ്സില് കാര് ഇടിച്ചുകയറിയായിരുന്നു അപകടം.
പത്തനംതിട്ടയിലെ മല്ലശ്ശേരിയിലെ രണ്ട് കുടുംബങ്ങളുടെ സന്തോഷവും പ്രതീക്ഷയുമാണ് ഒരൊറ്റ നിമിഷം കൊണ്ട് പൊലിഞ്ഞത്. എട്ട് വര്ഷത്തെ പ്രണയത്തിനൊടുവില് വിവാഹിതരായി 15ആം ദിവസം നിഖിലിന്റെയും അനുവിന്റെയും വേര്പാട് ഒരു നാടിന്റെയാകെ ഉള്ളുലച്ചു. നവംബര് 30നാണ് നിഖിലിന്റെയും അനുവിന്റെയും വിവാഹം കഴിഞ്ഞത്. സ്വപ്നം കണ്ട ജീവിതം അവര് ജീവിച്ചു തുടങ്ങിട്ട് ദിവസങ്ങള് മാത്രമേ ആയിട്ടുള്ളൂ. പക്ഷേ എല്ലാ സന്തോഷങ്ങളും അപകടം കവര്ന്നെടുത്തു. നിഖിലിനേയും അനുവിനേയും കൂട്ടാന് എയര്പോര്ട്ടില് എത്തിയത് മത്തായി ഈപ്പനും ബിജു പി ജോര്ജുമായിരുന്നു.
കാനഡയില് എഞ്ചിനീയറായി ജോലി ചെയ്യുന്ന നിഖില് കഴിഞ്ഞ മാസം 25നാണ് വിവാഹത്തിനായി നാട്ടിലെത്തിയത്. അനുവിന്റെ പിറന്നാള് ആഘോഷമാക്കാനുള്ള തയ്യാറെടുപ്പിനിടെയാണ് ദുരന്തമുണ്ടായത്.
