ഒടുവില് അതും ചീറ്റി; മെസി കേരളത്തിലേക്കില്ലെന്ന് സ്ഥിരീകരിച്ച് കായികമന്ത്രി
ഫുട്ബോള് ഇതിഹാസം ലയണല് മെസിയെ കേരളത്തിലേയ്ക്കു കൊണ്ടുവരും എന്ന് കായിക മന്ത്രി വി അബ്ദുറെഹ്മാനും സര്ക്കാരും പറച്ചില് തുടങ്ങിയിട്ട് വര്ഷങ്ങളായി. ഇപ്പോഴിതാ മെസി കേരളത്തിലേക്ക് എത്തില്ലെന്ന് സ്ഥിരീകരിച്ചിരിക്കുകയാണ് മന്ത്രി വി അബ്ദുറെഹ്മാന്. താരത്തിന് ഒക്ടോബറില് വരാന് കഴിയില്ലെന്നും മന്ത്രി അറിയിച്ചു. ഒക്ടോബറില് വരാന് കഴിയില്ലെന്ന് പറഞ്ഞപ്പോള് സ്പോണ്സര് ആണ് പറഞ്ഞത് എന്നാല് വരേണ്ടെന്ന്. കേരളം ഈ കരാറില് വിട്ടവീഴ്ച ചെയ്തിട്ടില്ലെന്നും മന്ത്രി ട്വന്റി ഫോറിന് നല്കിയ അഭിമുഖത്തില് പറഞ്ഞു.
മെസി വരാനുള്ള സാധ്യതയില്ലെന്ന് മന്ത്രിയുടെ ഓഫീസ് തന്നെ അറിയിച്ചു. ഡിസംബറില് മെസി ഇന്ത്യയിലെത്തുമെങ്കിലും ഷെഡ്യൂളില് കേരളം ഇടം പിടിച്ചിട്ടില്ല. ഡിസംബര് 11 മുതല് 15 വരെയാണ് മെസിയുടെയും ടീമിന്റെയും ഇന്ത്യ സന്ദര്ശനം. കൊല്ക്കത്ത, മുംബൈ, ഡല്ഹി, അഹമ്മദാബാദ് എന്നി നഗരങ്ങളില് മെസിയും സംഘവും എത്തും.
കൊല്ക്കത്തയില് എത്തുന്ന ടീം ഇന്ത്യന് ടീമുമായി സൗഹൃദ മത്സരം നടത്തുമെന്നും സൂചനയുണ്ട്. പിന്നീട് വാങ്കഡെയിലും ഒരു ക്രിക്കറ്റ് മത്സരം കളിക്കാന് അനുവദിക്കാനും പദ്ധതിയുണ്ട്. റിപ്പോര്ട്ട് ശരിയെങ്കില് വാംഖഡെ ക്രിക്കറ്റ് സ്റ്റേഡിയത്തില് വിരാട് കോലിക്കും എം.എസ്. ധോണിക്കുമെതിരെ മെസി പാഡണിയും. ഏഴുപേരടങ്ങുന്ന ടീമുകള് പരസ്പരം ഏറ്റുമുട്ടും. രോഹിത് ശര്മയും സചിന് തെന്ഡുല്ക്കറും ഉള്പ്പെടെയുള്ളവരും അന്നേദിവസം വാംഖഡെയില് എത്തുമെന്ന് റിപ്പോര്ട്ടില് പറയുന്നു.
2011നു ശേഷം ആദ്യമായാണ് മെസി ഇന്ത്യയിലേക്ക് വരുന്നത്. അന്ന് കൊല്ക്കത്തിയിലെ സാള്ട്ട് ലേക്ക് സ്റ്റേഡിയത്തില് വെനസ്വേലക്കെതിരെ അര്ജന്റീന സൗഹൃദ മത്സരം കളിച്ചിരുന്നു.
