ഷൂട്ടിങ് പൂര്ത്തിയാകും മുന്പ് 350 കോടി ക്ലബിലെത്തി 'ദൃശ്യം 3'!
ഷൂട്ടിങ് പൂര്ത്തിയാകും മുന്പ് 350 കോടി ക്ലബിലെത്തി മോഹന്ലാല് ചിത്രം ദൃശ്യം 3. നിര്മാതാവ് എം രഞ്ജിത്ത് ആണ് ഈ അപ്ഡേറ്റ് പുറത്തുവിട്ടത്.
'ഷൂട്ടിങ് നടന്നുകൊണ്ടിരിക്കുമ്പോള് തന്നെ ഇന്ത്യയിലെ ഒരു പ്രാദേശികഭാഷാ ചിത്രത്തിന് ഇത്രയും വലിയ ബിസിനസ് ലഭിക്കുന്നത് ആദ്യമായാണ്. അങ്ങനെ നോക്കിയാല് എത്രയോ ഉയരത്തിലാണ് മലയാള സിനിമ എത്തിയിരിക്കുന്നത്. മികവുള്ള സിനിമകള് കൂടുന്നുമുണ്ട്. ഏറ്റവും നല്ല തിയറ്ററുകള് ഉള്ളതും കേരളത്തിലാണ്. 'തുടരും' സിനിമ ഇറങ്ങിയതിന് ശേഷം കിട്ടിയ ഷെയര് 55 കോടി രൂപയാണ്. സിനിമ വിജയിക്കുമ്പോള് ഏറ്റവും കൂടുതല് പണം കിട്ടുന്നത് സര്ക്കാരിനാണ്', എം രഞ്ജിത്തിന്റെ വാക്കുകള്.
ദൃശ്യം 3യുടെ ലോകമെമ്പാടുമുള്ള മുഴുവന് തിയേറ്റര് അവകാശങ്ങളും ഡിജിറ്റല് അവകാശങ്ങളും പനോരമ സ്റ്റുഡിയോസ് സ്വന്തമാക്കിയിരുന്നു. ദൃശ്യത്തിന്റെ ഹിന്ദി പതിപ്പിന്റെ നിര്മാതാക്കളാണ് പനോരമ സ്റ്റുഡിയോസ്. ജോര്ജ്കുട്ടി എന്ന കഥാപാത്രത്തിന് നാല് വര്ഷത്തിന് ശേഷമുണ്ടാകുന്ന മാറ്റങ്ങളെ ആണ് മൂന്നാം ഭാഗത്തില് കൊണ്ടുവരുന്നതെന്ന് ജീത്തു ജോസഫ് നേരത്തെ പറഞ്ഞിരുന്നു. ആദ്യ രണ്ട് ഭാഗങ്ങളെപ്പോലെ ഒരു ഹെവി ഇന്റലിജെന്റ് സിനിമയല്ല മൂന്നാം ഭാഗമെന്നും ജീത്തു ജോസഫ് വ്യക്തമാക്കി.
