27 വര്ഷങ്ങള്ക്ക് ശേഷം ഡല്ഹി ബിജെപിയുടെ കൈപ്പിടിയില്; കെജ്രിവാളും സിസോദിയയും തോറ്റു
നീണ്ട 27 വര്ഷങ്ങള്ക്ക് ശേഷം ഡല്ഹി ഭരണം ബിജെപിയുടെ കൈകളിലേക്ക്. ഡല്ഹി നിയമസഭാ തിരഞ്ഞെടുപ്പിലെ വോട്ടെണ്ണല് പുരോഗമിക്കുമ്പോള് 48 സീറ്റുകളില് ബിജെപി വിജയത്തിലേക്ക് കുതിക്കുകയാണ്. തുടര്ച്ചയായി വീണ്ടും അധികാരത്തിലേറാന് മോഹിച്ച എഎപിക്ക് കാലിടറുകയാണ്. 22 സീറ്റുകളിലായി ആം ആദ്മി ഒതുങ്ങി. കോണ്ഗ്രസിന് ഇത്തവണയും അക്കൗണ്ട് തുറക്കാനായില്ല.
വോട്ടെണ്ണല് തുടങ്ങി ആദ്യ മണിക്കൂര് പിന്നിടുമ്പോള് ബിജെപി ലീഡ് മുന് മുഖ്യമന്ത്രി അരവിന്ദ് കെജ്രിവാളിനും ആം ആദ്മി നേതാവ് മനീഷ് സിസോദിയ്ക്കും കാലിടറി.
എഎപിയുടെ വോട്ടുകള് ബിജെപിയിലേക്ക് ചോര്ന്ന് പോയെന്നാണ് കണക്കുകള് വ്യക്തമാക്കുന്നത്. ഡല്ഹിയിലെ മധ്യവര്ഗ വോട്ടര്മാരും പൂര്വാഞ്ചല് വോട്ടര്മാരും ഇത്തവണ ബിജെപിക്ക് അനുകൂലമായി വിധിയെഴുതി. ഡല്ഹി നിയമസഭാ തിരഞ്ഞെടുപ്പിലെ എഎപിയുടെ തകര്ച്ചയില് കനത്ത പ്രഹരമായി ദേശീയ അധ്യക്ഷനും മുന് മുഖ്യമന്ത്രിയുമായ അരവിന്ദ് കെജ്രിവാളിന്റെയും എഎപി നേതാവ് മനീഷ് സിസോദിയയുടെയും തോല്വി. 4089 വോട്ടുകള്ക്കാണ് കെജ്രിവാളിന്റെ ദയനീയ തോല്വി.അതേസമയം ഇഞ്ചോടിഞ്ച് പോരാട്ടത്തിനൊടുവില് കല്കാജി മണ്ഡലത്തില് ഡല്ഹി മുഖ്യമന്ത്രിയും എഎപി നേതാവുമായ അതിഷി വിജയക്കൊടി പാറിച്ചു.
വോട്ടെണ്ണല് 10 റൗണ്ടും പൂര്ത്തിയാകുമ്പോള് മനീഷ് സിസോദിയ തോറ്റത് 675 വോട്ടുകള്ക്കെന്ന് തിരഞ്ഞെടുപ്പ് കമ്മിഷന്റെ കണക്കുകള് വ്യക്തമാക്കുന്നു.
തുടര്ച്ചയായി 2015ലും 2020ലും ആം ആദ്മി പാര്ട്ടിയുടെ മികച്ച വിജയം ഉറപ്പാക്കുന്നതില് നിര്ണായക പങ്കുവഹിച്ചത് മധ്യവര്ഗ വോട്ടര്മാരും പൂര്വാഞ്ചല് വോട്ടര്മാരും ആണ്. ഈ വോട്ടര്മാര് എതിരായതോടെ ആം ആദ്മി പാര്ട്ടിക്ക് പിടിച്ചു നില്ക്കാനായില്ല. മധ്യവര്ഗത്തിനും പൂര്വാഞ്ചല് വോട്ടര്മാര്ക്കും സ്വാധീനമുള്ള 25 സീറ്റുകളില് ബിജെപിയാണ് മുന്നിട്ട് നില്ക്കുന്നത്. 27 വര്ഷങ്ങള്ക്ക് ശേഷമാണ് ബിജെപി ഡല്ഹിയില് ഭരണം ഉറപ്പിക്കുന്നത്.
