ശതകോടികളുടെ പകുതി വില തട്ടിപ്പ് കേസ്: കോണ്ഗ്രസ് നേതാവ് ലാലി വിന്സെന്റിന്റെ വീട്ടില് അടക്കം 12 ഇടത്ത് ഇ ഡി റെയ്ഡ്
ശതകോടികളുടെ പകുതി വില തട്ടിപ്പ് കേസില് കോണ്ഗ്രസ് നേതാവ് ലാലി വിന്സെന്റിന്റെ വീട്ടില് അടക്കം 12 ഇടത്ത് ഇ ഡി റെയ്ഡ്. പാതിവില തട്ടിപ്പ് കേസിലെ പ്രധാനസൂത്രധാരനെന്ന് സംശയിക്കുന്ന ആനന്ദകുമാറിന്റെ വീട്ടിലും ആനന്ദകുമാറിന്റെ ഭാരവാഹിത്വത്തില് ഉള്ള തോന്നയ്ക്കല് സായിഗ്രാമത്തിലും റെയ്ഡ് നടക്കുന്നുണ്ട്. നേരത്തെ കേസില് ഇ ഡി കേസ് രജിസ്റ്റര് ചെയ്തിരുന്നു. ഇ ഡിയുടെ കൊച്ചി ഓഫീസാണ് റെയ്ഡ് നടത്തുന്നത്.
നേരത്തെ ലാലി വിന്സെന്റിനെ പകുതിവില തട്ടിപ്പ് കേസില് പൊലീസ് പ്രതിചേര്ത്തിരുന്നു. കണ്ണൂര് ടൗണ് പൊലീസ് എടുത്ത കേസില് ലാലി വിന്സെന്റ് ഏഴാം പ്രതിയാണ്. ഈ കേസില് ലാലി വിന്സെന്റിന്റെ അറസ്റ്റ് ഹൈക്കോടതി തടഞ്ഞിരുന്നു. ലാലി വിന്സെന്റിന്റെ മുന്കൂര് ജാമ്യാപേക്ഷയിലായിരുന്നു ഹൈക്കോടതിയുടെ നടപടി. ലാലി വിന്സെന്റിനെതിരായ ആക്ഷേപം ഗൗരവതരമെന്നും ഹൈക്കോടതി ചൂണ്ടിക്കാണിച്ചിരുന്നു.
അനന്തു കൃഷ്ണന്റെ സ്ഥാപനത്തില് നിന്ന് താന് 40 ലക്ഷം രൂപ വക്കീല് ഫീസായി കൈപ്പറ്റിയിരുന്നുവെന്നും തട്ടിപ്പില് പങ്കില്ലെന്നും ലാലി വിന്സെന്റ് പറഞ്ഞിരുന്നു. നിയമോപദേശത്തിനായാണ് പണം കൈപ്പറ്റിയത്. മറ്റു സാമ്പത്തിക നേട്ടങ്ങളൊന്നും ഇല്ലെന്നും ബാങ്ക് അക്കൗണ്ട് പരിശോധിക്കാമെന്നുമായിരുന്നു ലാലി വിന്സെന്റ് പറഞ്ഞത്. അനന്തു കൃഷ്ണനെ പരിചയപ്പെടുത്തിയത് ലാലി വിന്സെന്റ് ആണെന്ന എന്ജിഒ കോണ്ഫെഡറേഷന്റെ ചുമതലയുണ്ടായിരുന്ന ആനന്ദകുമാറിനെ വാദവും ലാലി തള്ളിയിരുന്നു.
