കളമശേരി പോളിടെക്നിക് ലഹരി കേസില് കൂടുതല് പ്രതികള് അറസ്റ്റിലായേക്കും. ക്യാമ്പസിലെ വിദ്യാര്ത്ഥികള്ക്ക് കഞ്ചാവ് എത്തിച്ചവരെ പറ്റി കൃത്യമായ സൂചനകള് കിട്ടിയിട്ടുണ്ടെന്ന് പൊലീസ് അറിയിച്ചു. കോളേജിലെ പൂര്വ വിദ്യാര്ഥികള് ഉള്പ്പെടെയുള്ളവര് അന്വേഷണ പരിധിയിലുണ്ട്.
ഹോസ്റ്റലില് കഞ്ചാവ് എത്തിച്ചത് പൂര്വ്വ വിദ്യാര്ത്ഥിയാണെന്നാണ് പൊലീസ് അനുമാനം. പിടിയിലായ വിദ്യാര്ത്ഥികളുടെ മൊഴിയില് നിന്നാണ് പൂര്വ്വ വിദ്യാര്ത്ഥിക്കെതിരായ തെളിവുകള് ലഭിച്ചത്. എറണാകുളം സ്വദേശിയായ പൂര്വ്വ വിദ്യാര്ത്ഥിയെ കണ്ടെത്താന് പൊലീസ് അന്വേഷണം വ്യാപകമാക്കി. റെയ്ഡിന് പിന്നാലെ ഇയാള് ഒളിവില് പോയെന്നാണ് നിഗമനം. ആകാശിനെ വീണ്ടും ചോദ്യം ചെയ്യും.നിലവില് റിമാന്ഡിലായ മുഖ്യപ്രതി ആകാശിനെ കസ്റ്റഡിയില് വാങ്ങി ചോദ്യം ചെയ്യാനും പൊലീസ് തീരുമാനിച്ചിട്ടുണ്ട്. ഇതിനായുള്ള അപേക്ഷയും പൊലീസ് ഉടന് കോടതിയില് സമര്പ്പിക്കും.
കോളേജ് ഹോസ്റ്റലില് നിന്നും 2 കിലോയിലേറെ കഞ്ചാവ് ശേഖരമാണ് പിടിച്ചെടുത്തത്. 2 എഫ് ഐ ആറുകളാണ് പൊലീസ് രജിസ്റ്റര് ചെയ്തത്.
ഹോസ്റ്റലിലെത്തിയ അന്വേഷണ സംഘം കണ്ടത് കഞ്ചാവ് അളന്ന് തൂക്കി ചെറിയ പായ്ക്കറ്റുകളിലേക്ക് മാറ്റുന്ന വിദ്യാര്ത്ഥികളെയാണ്. ഹോസ്റ്റലില് നിന്നും 10 കിലോ കഞ്ചാവ് പിടിച്ചതിന്റെ ഞെട്ടലിലാണ് കേരള പൊലീസും.
ഡാന്സാഫ് സംഘം റെയ്ഡിനായി ഹോസ്റ്റലില് എത്തുമ്പോള് വിദ്യാര്ത്ഥികള് കഞ്ചാവ് അളന്ന് തൂക്കി ചെറിയ പായ്ക്കറ്റുകളിലേക്ക് മാറ്റുകയായിരുന്നുവെന്ന് റെയ്ഡിന് നേതൃത്വം നല്കിയ കൊച്ചി നര്ക്കോട്ടിക് സെല് എസിപി അബ്ദുല്സലാം പറഞ്ഞു. തൂക്കി വില്പ്പനക്കുള്ള ത്രാസടക്കം കണ്ടെത്തിയെന്നും ഇത്രയധികം അളവില് കോളേജ് ഹോസ്റ്റലില് നിന്ന് ലഹരി കണ്ടെത്തിയത് പൊലീസിനെ പോലും ഞെട്ടിച്ചെന്നും എസിപി പറഞ്ഞു.
ഇന്നലെ രാത്രിയില് തുടങ്ങിയ പരിശോധന ഇന്ന് പുലര്ച്ചെ നാല് മണി വരെ നീണ്ടു നിന്നു. ഓടി രക്ഷപ്പെട്ട മൂന്ന് വിദ്യാര്ഥികള്ക്കായി തെരച്ചില് തുടരുകയാണ്. അതേസമയം ഇത്ര അധികം കഞ്ചാവ് ഹോസ്റ്റലില് എത്തിച്ച ആളെ തിരിച്ചറിഞ്ഞിട്ടുണ്ടെന്നും പൊലീസ് പറഞ്ഞു. 2 എഫ് ഐ ആറുകളാണ് പൊലീസ് രജിസ്റ്റര് ചെയ്തത്. ആദ്യത്തെ എഫ് ഐ ആറില് കൊല്ലം കുളത്തുപ്പുഴ സ്വദേശി ആകാശ് (21) പ്രതിയാണ്. പ്രതി വില്പനയ്ക്കും ഉപയോഗത്തിനും വേണ്ടിയാണ് കഞ്ചാവ് സൂക്ഷിച്ചത്. രണ്ടാമത്തെ എഫ്ഐആറില് രണ്ട് പ്രതികളാണുള്ളത്. ഹരിപ്പാട് സ്വദേശി ആദിത്യന്(21), കരുനാഗപള്ളി സ്വദേശി അഭിരാജ്(21) എന്നിവരാണ് ഈ കേസില് പ്രതികള്.
